艺人点过中秋?林钰洧陈晓华烧灯笼呕月饼

艺人点过中秋?林钰洧陈晓华烧灯笼呕月饼

中秋节又嚟啦,今年受疫情影响,气氛大不如前,艺人们于过往嘅中秋节都有唔少疯狂、难忘嘅经历,同大家逐一分享!

林钰洧:“其实我屋企人都冇乜庆祝中秋节,不过有一年,我好细个,记得应该小学五、六年级,妈咪拎咗一盒双黄白莲蓉月饼畀我,佢就去返工做嘢,我自己一个开月饼食,食咗成个双黄莲蓉月饼,好记得,食完过咗一阵,我饱到呕,呢个几难忘,呕咗成个月饼出嚟,我都唔敢睇。”

何广沛:“喺香港过中秋就会觉得系理所当然,自己最难忘嘅中秋系喺外国嘅时候,简简单单同亲友一齐过,因为人在异地已经觉得好温馨。”

陈晓华:“喺大学嘅时候,成班同学一齐亲手整纸灯笼玩,我攞住晒大家啲灯笼,点知其中一个灯笼着火,一路烧咗五六个,即刻掉咗。不过,自己个嗰就冇烧到,只系烧咗人哋嗰啲,哈哈。”

余晓彤:“最难忘嘅中秋节系去年同前年,因为我要参加长跑比赛,呢两年都冇得喺香港过中秋,去年喺克罗地亚,前年喺戈壁沙漠,记得喺沙漠见到满天都系星星,第一次喺沙漠赏月,我仲带咗月饼喺沙漠自己食,去年喺克罗地亚,我都带月饼同纸灯笼,同当地人分享中秋节,佢哋觉得好有趣,觉得啲纸灯笼好靓,问我可唔可以送畀佢哋做纪念。今年喺香港过中秋,好似好耐冇喺香港过,同朋友、家人简简单单食饭、食月饼,我仲买咗好多月饼送畀亲戚。”

Leave a Reply

Your email address will not be published. Required fields are marked *