何沛珈访问红磡爆疫粥店食客 吓到心慌愈行愈开

何沛珈访问红磡爆疫粥店食客 吓到心慌愈行愈开

红磡日前多幢楼宇污水被验出新冠病毒,一间粥店更爆发感染群组,多名员工及其家人染疫,早前加入《东张西望》做主持嘅落选港姐何沛珈(原名:何孟珊)被委派重任到该区街坊,佢去到殡仪业棺材铺、花店访问,都未见佢有太大担心,直至喺街上追访一位伯伯时,竟然吓到弹开!

当佢得知对方喺8至10日前曾到访爆疫粥店时,明显开始有啲惊慌失措,对方就话搵紧边度可以做检测,而何沛珈就愈行愈远,又拧转脸望向镜头外嘅摄制队,用眼神沟通“求救”,最后都叫顺利完成访问!而事后佢喺社交网解释:“其实我好多嘢都唔怕,但嗰刻冇番个N95保护我真系唔敢行咁近!新丁只希望练到周身刀,第日机会来到就可以大派用场!”出完外景佢都立即做番个快速测试,最后冇事都安心晒!

其实《东张》连日都有派主持到较严重地区采访,其中游莨维(1蚊Joe)就去到解封后嘅油麻地庙街、黄恺怡去到曾纳入强制检测大厦名单嘅深水埗长乐大厦、黄耀英到曾被封锁嘅北角东发大厦,众人都非常淡定,唔通师姐师兄食过夜粥系唔同啲?

而何沛珈亦透露改名原因,原来系唔想再“慢”:“希望走得更远更快更耐,不再‘孟”’了,多多指教!”

Leave a Reply

Your email address will not be published. Required fields are marked *