郑丹瑞自爆被林子祥推戏 陈德森拍戏拍到抑鬱
由崔建邦与麦美恩主持的无綫清谈节目《诸朋好友》最新一集继续由资深电影人郑丹瑞（阿旦）及陈德森担任嘉宾。阿旦表示从无想过亲自饰演《小男人周记》男主角，但当时找不到人演出：“当时林子祥拍完《三人新世界》，我就去搵林子祥演《小男人周记》，点知佢话呢个角色只可以系你做，冇第二个做到，我话你即系推我啦！”
该片成功后，阿旦有意开拍另一套电影《我老婆唔系人》，他即时想起找好友陈德森做导演，陈德森说：“嗰次系我第一次做导演，当时令我差啲想离开电影圈，陈庆嘉系监制，佢个绰号叫Fax陈，之前系冇剧本，只会每日会Fax几页纸大纲过嚟，真系搞到我胃溃疡，我觉得我做唔到佢哋要求，嗰段时间令我有少少犹豫系咪适合做导演。”
此外，他又讲到拍摄电影《十月围城》时拍到抑鬱，中途突然离开：“一部成亿制作嘅电影，有10几个大明星参与，而且咁大个景。个景一搭完就落大雨唔可以开工，因为好危险，所以延迟咗一个月开工，监制叫我唔使理咁多，叫我好好享受做导演就得，但有演员因为档期问题去搵我，咁我可以点，我好似投诉无门咁，终于我顶唔顺，食3粒安眠药都只系瞓到3个钟，午夜梦回发梦我大叫Cut，嘈醒晒条走廊所有人，后来我传咗短讯畀监制，我话我走喇，你拍埋佢。我系返咗香港睇医生，我食完抑鬱药瞓咗26个钟，起身用叉食生果，我叉咗落张枱布，系叉唔到任何嘢，但我照放入口，家姐话见到我咁嘅情况，叫我留番条命，唔好再返去拍，搞好自己先。直到套电影嘅工作人员写咗封信畀我话，如果我今日决定唔返去，佢哋都撤退，咁我觉得我系千古罪人，后尾我就返去，一返到去就撞到刘伟强导演拎住行李，我叫佢返房放低行李先，佢话依家我嚟救火，仲放低行李，去睇景先啦！香港电影人真系好团结，好多谢大家帮手。后来呢套戏我攞最佳导演，当时系刘伟强颁奖畀我，我叫佢企埋过嚟，我话你都有份。”
