陈山聪囝囝满月Warm爆影全家福

陈山聪囝囝满月Warm爆影全家福

艺人陈山聪今个月月头做爸爸,太太Apple为佢诞下囝囝陈霆轩(Jaco),估唔到Jaco咁快已经满月,见佢哋一家三口着上亲子装影相,非常温馨,而坐紧月嘅Apple望落气色唔错,精神好好!

Jaco影相时亦表情多多,不时“眼超超”,而陈山聪抱住Jaco亦父爱涌现,表现出慈父一面,佢喺社交网留言:“满月霆轩#chan’sfamily #一家三口 #全家福 #ajboy #jaco #陈山窿2.0 #身体健康 #快高长大 #聪明伶俐 #顶天立地 #love #陈爸陈妈唔易做”

陈山聪接受东网访问时,表示之后要忙于开工,所以趁今日囝囝满月,一家人齐齐影靓靓家庭照,他谓:“BB件白色衫系袁伟豪好耐之前喺日本买,佢知我锺意呢个品牌,之后我喺香港买埋畀自己同老婆,大家齐齐着,扮靓仔影吓相,我都有用碌柚叶同BB冲凉,希望佢身体健康、快高长大,同埋依家准备开始帮佢戒夜奶,希望戒得掂。”

山聪之前经常自己去街市买材料煲汤给太太,又帮BB冲凉,果然系廿四孝老公及爸爸,他谓:“我之前嗰几日唔使开工,又停咗外景,所以由我去街市,陪月姐姐留喺屋企,但因为依家疫情关系,我唔想佢出街,太危险,我一个去就算嘞!佢就负责睇BB、照顾太太,石崇鱼好好㗎,我有朋友做鱼档,佢每两日就新鲜运畀我,我唔使出去买嘅,而阿仔其中一个契爷,都有买啲好大条嘅石崇鱼畀我哋煲汤。”

Leave a Reply

Your email address will not be published. Required fields are marked *