唔识搞好人际关系 Gin Lee被别人误解而受伤
“环球一姐”Gin Lee（李幸倪）的新歌《IDK》破格挑战新曲风，内容提醒大家保持求知心态，她说：“都贴切依家社会，好多人锺意表达意见，OK冇问题，但唔使太过批判，留啲空间畀其他可能性。”面对网上负面批判，或多或少都会影响而令自己不开心，她说：“我唔系成日睇comment，但做音乐都要知人哋锺唔锺意或者反应，要有心理准备先去睇。”
Gin曾经试过因别人的误解而觉得受伤，她说：“可能我做一件觉得有意义或者对大家系好事，但网民睇唔到宏观嘅结果，觉得我系为咗钱、为咗个人利益，好表面咁批判我，但可能我系冇收钱，啲人又唔知，我系会觉得hurt，但都唔可以受影响而唔去做，惟有同自己讲问心无愧，知道自己做紧乜。”
有段时间她都感到气馁，她说：“我锺意唱歌啫，点解咁难。”但她明白唱歌同唱歌事业是两回事，必须要分得清楚，她说：“锺意唱歌可以无忧无虑去唱，但当你唱歌系一个事业，唔可以净系话我想唱歌、录音啫，都要出去宣传、排舞，做一啲唔系咁擅长嘅嘢，当我气馁时会同自己讲呢个系我事业，人际关系我唔叻要学，知道唔系斋唱歌咁简单。”
她承认人际关系比较弱，自认是宅女的她，明白自己这种性格在娱乐圈好蚀底，她笑说：“系有啲影响，我社交唔系咁叻。（保持社交距离？）一路有保持，所以冇问题，防疫对我嚟讲唔系咁难。”
她表示过去咁多年将自己专注力全摆在研究歌艺、跳舞表演上，但依家会尝试主动认识朋友。多年来盛传她有个神秘男友，她气馁时是否想有个人可依靠？她笑说：“迟啲啰，总会嘅，相信自己会结婚。”
