陶大宇太多包袱唔会轻易接剧：同TVB合作唔到係一个遗憾
陶大宇自09年离开TVB后，转战内地市场，北漂十年，虽然有工作有收入，但知名度大不如前，由最初的怨天怨地到后来相信“冇作品被淡忘係正常”，谁不知却在去年底以一首《倒转地球》成功转出话题以及多次热搜。两个月之内有近20场的商演及登台骚，爽赚7位数人仔，再旋风式回港出埋贺年歌。这天访问在室外拍摄完毕后，不少女士一见陶大宇即大叫“偶像”，并要求合照，师奶杀手变中女杀手，一切如他所说“而家一镬过拎返晒”。
唱夜场唔觉卑微
近年不少香港艺人北上搵食，陶大宇坦言内地工资的确比香港高，但要成功取得入场券并非易事，而他早在97年第一次离巢后已经部署，至09年正式离开TVB后，拿著入场券以及所有的累积奖金，北漂十年。由一线小生变为登台艺人，出入夜场多过片场，他并没有觉得被贬值身价：“打得呢份工，除咗拍戏，就係登台唱歌，如果我去织冷衫就话啫。五虎将以前都成日都星马登台，之不过而家内地市场代替了呢个市场，我完全唔觉得卑微，加上我係艺人，唔係专业歌手，做骚都係带欢乐畀大家。”以“处女座好麻烦”形容自己的陶大宇，坦言如果早在10年前看到自己作品被恶搞一定会十分㷫，但或许是经历过浮沉，加上岁月的增长，如今无论对人对事都不会太执着。
“呢行好奇怪，可以好突然间冇嘢做。过去十年我仍然喺呢行做紧嘢，只不过冇人去报道。呢行好现实，你受欢迎的话，出街都多人搵你影相；你冇作品，被淡忘係正常。我冇新作品，但我仍然运作，直到而家感觉好似係一镬过拎返晒，哈哈！当然係有动摇过、有唔开心过，但好在我係有工作做就开心。就算怨天怨地都好快就过，我可以自夸心态真係几好。”中学毕业后随即加入无綫，至今39年，陶大宇笑言转行的话，有如要老人家转用智能手机一样。“曾经有人约我出嚟，介绍一个旅行社老闆俾比认识，对方竟然叫我去带团，我真係搲晒头，当下冇黑面，但事后有检讨，自己一定有嘢做得唔好先会令人我係可以去带团。”
唔做小生反而有包袱
陶大宇早年曾两度离巢，由闹翻到赔钱终止合约，关係要几恶劣有几恶劣。但由他早前人在内地特地为《欢乐满东华》拍片筹款，到人在香港直踩电视城做访问，莫非真係没有永远的敌人？。他说：“佢哋人工低係事实，呢个係大家都知，但冇佢哋提供嘅渠道或者机会，你点会发挥长处？呢个係相辅相成，我入行都係我几千一个月，每年做得咁辛苦去renew份约都係加得4百蚊。做人都公道啲，佢真係比好多机会同知名度。其实我哋冇冰封过，一直都有搵我做嘢，只不过缘份未到。係有搵我拍剧……我觉得係自己问题，唔係好啱我做，加上档期问题，所以每次都合作唔到，其实都係一个遗憾。我要重申一次我係拍剧出身，唱歌係搵食工具。唔排除会返去，但我已经唔係小生，要睇角色我锺唔锺意，又要搵人衬到，我太多包袱同顾虑。以前可以揽揽锡锡，但而家唔得，好易会有反效果，唔得就真係唔得。”
