虫草大王陈恩德对TVB高层闹争不感到惊讶：呢啲公司係咁架啦!
有“虫草大王”之称的御药堂兼宠物药妆品牌老闆陈恩德（Mark)今日（7/2）现身粉岭出席北区派福袋送暖慈善活动。提到早前因李佳芯被TVB“无理要求”感侮辱后，决定割席抽起千万广告转投ViuTV。Mark表示：“其实除咗ViuTV之外，其实我都有喺其他平台落告广嘅。（乐小姐畀咗交代你未？）好似⋯处理紧！而我啲同事係有同佢哋公司相关人士联络中，但我就冇乜特别咁去理。（嗰件事后同李佳芯有否联络？）我过年时有同佢拜过年，只係我同佢呀！（咁佢有冇回覆你？）我期待啦，哈哈！（即係已读不回？）哈哈！我唔知呀！新正头呢啲唔重要啦！拜年呢样嘢係礼貌嚟啫。”
被问到会否避嫌，减少联络李佳芯？Mark表示：“对我嚟讲冇嘢要避嘅，所有都係朋友嚟，冇话避唔避嘅。（乐小姐早前作出回应话保护及尊重艺人意愿是经理人嘅基本责任，你收唔收货？）我谂呢啲回应我啲同事都唔收货，收唔收货就由佢哋决定啦！（但件事係你喎！咁你本人呢？）我本人就算喇！而我嘅决定都公开讲咗畀佢哋听嘞，佢哋就会因应我意愿去处理囉。”
问到在ViuTV落广告，服务对待好唔好？Mark笑言：“其实我就唔係直接接触嘅，咁但係相信应该相敬如宾嘅。（近来有传珍姐乐小姐同王祖蓝闹翻？）我都係睇报道先知。不过都唔奇吖，哈哈！（点解你会话觉得唔奇呢？）哎哟，我认识咗佢哋咁耐，哈哈！（经常见到佢哋闹交？）
我觉得係自然发生嘅嘢嚟啫，呢啲公司係咁啦，呢啲山头各据，呢啲唔係我哋外人去理。（珍姐有冇搵你？）阿珍姐係好朋友，讲真呢个时间都避嫌啦！而我又唔会特别去联络佢哋啦。（怕唔怕影响李佳芯前途？）讲工事，其实我都唔想影响到佢嘅，呢近就等睇微电影囉，因为坊间有好多传言，到时就睇吓微电影出唔出到嚟囉。”
