乐易玲否认跟王祖蓝不和 为“虫草大王”陈恩德抽无綫广告解画
王祖蓝近日被传与TVB高层乐易玲、曾励珍为钟嘉欣未能夺视后闹不和，意兴阑珊带无綫艺人到内地交流另谋发展。乐易玲今天（10日）出席《飞虎3壮志英雄》活动，对于被传跟祖蓝爆不和，她说：“几十岁边会嗌交啫？边有交嗌？都冇咁嘅事，祖蓝回应晒喇！因为佢（祖蓝）话呢个唔係事实，都唔使讲啦！（报道对你不公平？）做咗呢行几多年呀？成日都见到呢啲嘢，都唔新鲜，係咪？有乜所谓啫？
我反而有睇佢（祖蓝）诗篇嗰个post同like咗，佢写得好好，大家喺呢行成日面对呢啲流言，虽然我哋话唔理，谂吓都有影响心情，好彩大家忙到不得了，根本连静落嚟时间都冇，我噚晚做到4点，今早就开会。（跟王祖蓝通电话？）冇唔开心，今日先开完会，点会唔开心？日日对咁耐仲通电话，开会有视像。”
问到是否因视后奖项出现分歧？乐易玲说：“咁多年我哋有投票机制，呢啲大家唔好喺度讲，如果再讲机制，就明年讲，我哋每一年都有讲机制，每年有呢啲新闻係好，即係个个注意呢个奖项，都OK嘅，我哋做娱乐圈，冇新闻点会有娱乐呢？”
谈到“虫草大王”陈恩德中止跟TVB合作并抽起千万元广告，乐易玲说：“首先几多钱广告要问广告部，我就完全唔知佢落几多钱广告嘅，如果问我佢有冇用我哋artist？佢间中有用嘅，当日见到戴祖仪、蔡洁、Do姐（郑裕玲）都喺度，所以唔知有乜事发生，睇报道先知，嗰个都係我部门，我都回覆咗，已经写咗出嚟，呢个唔係公司嘅工作，呢个係一个external engagement，艺人係有权锺意想做定唔想做，咁我觉得喺我哋经理人立场，我哋一定要照顾艺人先…哈哈，佢（陈恩德）追紧女仔呀？”
问到李佳芯（Ali）当日有没有透露为何没有出席？乐易玲说：“Ali有讲见到咁多呢啲新闻都好困扰，希望有一日唔使见到呢啲新闻。（因为这样而缺席？）如果接咗一样嘢唔做就叫缺席，冇接嗰样嘢唔係叫缺席，我打个比喻。（Ali有没有接？）我冇见到有contract呢啲，我冇见到啦！”
有指事件令TVB损失逾千万元收入，问乐易玲有没有添烦恼？她说：“公司好好，我觉得公司态度，同埋artist management态度一样，首要係保护自己艺人，好似我哋拍戏、做嘢又好，我个部门以艺人福祉为重要宗旨，钱…老闆冇畀过任何压力我，我都冇畀压力我啲同事。”
