太熟冇Feel！曾乐彤同杨天宇返屋企煮牛扒唔过电
英皇歌手曾乐彤连续两年搵同公司的型男杨天宇合作拍片，早前佢哋两个就分享抗疫居家晚餐，由超市买食材到返屋企整牛扒同带子，好有情侣feel，不过曾乐彤就讲明同杨天宇冇发展嘅可能，原因系大家好“骑呢”。
佢话杨天宇系佢隔篱学校嘅校友，识咗足足有10几年，连经理人霍汶希（Mani）都睇死佢哋唔会有嘢发生：“嗰次我哋要去北京casting，Mani直情叫我哋两个自己去，因为觉得我哋两个就算摆喺同一间屋，都会有任何嘢发生。”又话现时最大目标是搵钱。
讲到杨天宇呢种靓仔类型，唔系佢杯茶，佢就话自己绝对唔系“外貌协会”成员：“我锺意嘅男仔，唔一定要靓仔，要睇佢嘅价值观，大家系咪沟通到，有冇一技之长，如果佢可以将兴趣发展到极致，可以好专心咁做一样嘢，我会支持啰，赚唔到钱都系其次，最紧要有热诚喺度，佢爱唔爱自己生命好重要。”
现时第5波疫情严峻，佢期待之前拍咗嘅电影可以上映外，另一件人生大事亦受到影响要延期：“其实我本来要考车牌嘅，但因为疫情冇得考住，不过我有信心考到，因为一睇我个样就知我系‘神’，大约12个钟就识泊车掉头。”佢话希望考两次就可以考到车牌，又搞笑话：“因为依家冇得练车，我搭的士时都会模拟自己学紧车，见到阻碍物就会话打灯，会周围望。”
