钟嘉欣忆生大女全程吸氧气 下体出血拒做重建手术
艺人锺嘉欣2015年年底闪嫁脊医老公Jeremy，翌年更喺加拿大诞下大女Kelly，当时佢只隔空宣布生B喜讯，未有谈论详细生B过程，事隔多年佢拍片自爆，原来当时情况危急，分娩过程相当痛苦！
佢指由于当时首次怀孕，唔了解官缩真实感受，原本医生指示扩张至5厘米就要入院，但佢未有为意，喺准备生B前如常食早餐，岂料仲未食饱，就突然下体流血，即被奶奶赶去医院，先发现原来子宫口已扩张至8厘米，等扩张至10厘米就可以分娩。
医生即急急安排佢入产房，而佢更全程都要吸氧气，当时佢请求护士喺黑板上写上Kelly嘅名字，一心谂住想安全带囡囡嚟到呢个世界，同时谂住妈妈有过类似经历，再加上老公嘅鼓励，种种精神寄托下终挨过难关，完成分娩。
惟佢休息1小时后落床小解，却行唔够两步已经下身出血，更晕倒喺洗手间内，幸好老公及时呼叫护士，医生即建议送去急症室进行重建手术，不过嘉欣坚持拒绝，最后医生同意观察1天冇异常就不需做手术，虽然嘉欣指之后嘅检查比分娩仲痛苦，但总算逃过一刀，并休养足足两个月先可以如常行路。
