金宵大厦2｜陈山聪全裸露股「香港限定」 内地观众不满冇得睇
由陈山聪及李施嬅主演的TVB奇幻剧集《金宵大厦2》日前首播，一班「金宵迷」都紧贴剧情，每集都掀起网民热烈讨论。当中Maurice（陈山聪饰）忽然跌落在金宵大厦天台上，更以全裸露股登场，这一幕大为震撼，不少观众都大讚他为演出而牺牲，而山聪在接受《香港01》访问时亦重申没有用替身：「我话梗係唔使替身，我做。其实去到后面大家解构到点解我会喺个天跌落嚟，然后全裸。」不过原来山聪这场牺牲色相的演出是「香港限定」，而内地版就被打格处理！
《金宵大厦》在2019年播出时赢尽口碑，续集《金宵2》自然一样受欢迎，除了本地剧迷睇得投入之外，亦吸引到不少内地观众追看。不过作为TVB与内地平台优酷的合拍剧，《金宵2》未有在优酷播出，而是在TVB内地官方平台「埋堆堆」独播，而且要付费成为会员才可以睇到最新一集，但原来内地网民所看的只是删减版，剧中的恐怖情节、惊悚画面等都被Cut，而山聪全裸露股的一幕就被「打格仔」，不少网民对于未能睇到原版大感失望，更纷纷留言表示不满。
提到剧集内地版经过修剪及删减，山聪就表示无奈：「我冇睇过内地版，但都好感谢金宵迷嘅支持，好多人都好紧张我係边个，係咪真係死咗，而呢个亦正正係我哋嘅特色，想有呢个效果。虽然删减係感觉争啲，但我都知因为套剧题材比较敏感、大胆，画面惊悚，所以冇办法，我都控制唔到。（全裸演出被Cut会唔会可惜？）咁我个『八月十五』又唔係咁需要睇嘅，唯有靠佢哋幻想下啦，同埋我都只会做一次，睇到后面就会知係全裸有原因嘅。（会唔会谂下点补偿返？）真係冇办法，就算我再Post都会Block咗我，内地唔容许，睇下以后点畀返啲甜头，拍多啲好戏啦。」
其实今次不但是山聪首次「露股」上阵，更是他拍剧以来尺度最大的一次：「绝对係有史以嚟最大嘅一次，就係咁先矜贵。（接唔接受到再豁出去正面全裸？）哗，梗係唔会啦，我作为一个爸爸，就算遮遮掩掩嗰啲我都接受唔到，我要对得住爸爸呢个身份。如果正面全裸我就去咗日本艺能界啦，但我唔想开拓呢条路线。」最后山聪亦再次感谢一班剧迷的支持，希望大家继续追看！
