内地节目撑港乐 李玟杨千嬅携手捧17岁炎明熹
王祖蓝被踢爆辞任TVB首席创意官，不过佢本身搞开、同内地平台合办嘅大型音乐综艺节目《声生不息》就继续有得做，仲搵嚟大班港将猛人助阵，好似天后李玟、李克勤、杨千嬅、叶茜文、林晓峰等，提携一众后辈炎明熹（GiGi）、许靖韵、毛不易等，真系星光熠熠！
最近节目组就搞民选“港乐”，嗌网友投票拣心水香港歌做表演曲目，宣传广东歌，投票歌单一共有20首作品，当中就有唔少大家耳熟能详嘅经典金曲，好似张国荣、梅艳芳、Beyond同李克勤嘅歌，仲有陈奕迅嘅《葡萄成熟时》、谭咏麟《爱情陷阱》等，搞到一班歌迷都好雀跃，个个等第一次公演时可以亲耳听到偶像翻唱好歌。
节目录影进行得如火如荼，李玟、杨千嬅、林晓峰、毛不易呢两日就被网友被拍得出入拍摄现场嘅靓相，而今次声梦人气王炎明熹就被指系重点新星，有一班前辈拱照，令佢都有机会北上发围，咁啱今日（9日）亦系佢17岁生日，人仔细细嘅佢虽然仲未“现身”，不过就有好姐妹锺柔美（Yumi）晒出旧合照庆祝。
