金牌媒人Bob又发功 誓帮胡定欣搵到好归宿
艺人林盛斌（Bob）向来有“金牌媒人”之称，曾撮合多对情人，包括慧敏与心脏科名医陈良贵、张秀文与金融才俊王大权等，近日佢亮相陈敏之影片频道节目，大谈媒人唔易做：“嗰十个八个成功曾经经历过无数嘅历练，先可以有呢个成绩，唔容易㗎，大把系约到出嚟系唔得。”
佢又直言认为年到40岁仍然单身的男女性格定有缺陷：“例如系口不对心，话唔使靓嗰啲，扮咩呀？咪又系要样靓、波大同脚长。女仔话唔使有钱，人哋揸架咩车出嚟又系到鄙视，收皮啦我心谂。”但亦认为自身条件好嘅人，对另一半有要求都系人之常情。
及后，佢更扬言下一个目标系视后胡定欣：“下一个我一定要搞掂佢，就系胡定欣，佢一定得㗎！独立，唔使你养，我问过一啲男仔，啲人会同我讲‘会唔会好恶？’觉得佢眼神凌厉，眉毛粗，嗰下怒瞪会摄走你，但佢嗰种温柔、可爱同女性化系好正，当然我都知定欣会有要求，啱唔啱眼缘同倾唔倾到偈……我会努力㗎，胡定欣，你等等。”
