袁伟豪静待事业第2春 以“蜕”为进想捞埋幕后
艺人袁伟豪（Ben）跟谭俊彦在TVB剧集《廉政行动2022》中首度合作，他回想两人廿多年前曾在同一场合食饭，但却未有机会合作，直至《廉》剧才结缘，说到合作感受，他坦言：“同佢合作好舒服，佢个性格好绅士，大家性格一凹一凸，我个人性格直白啲，但大家都系为件事好，佢会话唔使咁嘅，我喺佢身上学到嘢，但会唔会用出嚟系另一回事。”
他称自己在剧中的动作戏较少，危险的动作场面都落在谭俊彦身上，并盛赞对方恍如哥哥经常提点他：“有镜头我话唔使保护措施，佢话用啦，有得用点解唔用，感觉好哥哥。”
今年是Ben入行25周年，他表示工作上不排除所有可能性，并开始涉猎幕后工作，希望可以好好掌握未来方向：“以往我只系收到剧本去做，唔系由零开始参与，我想喺演出做得好啲，参与度高啲有助提升自己更专业。（幕后想做甚么岗位？）电视方面想尝试做策划同监制，音乐上想有自己创作。”Ben去年推出第一首歌，希望今年内推出5至6首新歌，并扬言正在静候幕前第二个爆发点。
对他来说2016至2019年是事业高峰期，迎来首个春天，他感恩工作略有成绩，但承认过程中有所迷茫及自我膨胀：“身边唔系冇人提点我，但观点与角度，当刻你觉得自己系冇问题，我嘅出发点系啱，但旁人睇你系唔啱，好难攞到平衡，自己都承受好大压力。”
然而，春天过后瞬间转入寒冬：“疫情少咗工作，大家都比较艰难，我都系食紧老本，用紧积蓄我认为呢段时间系好好嘅沉淀，到情况好番就出返嚟。其实我都好享受休息状态，忙咗十几年都冇休息过，呢几年变化好大，由我个事业春天开始，后来爸爸离开，呢几年我畀多咗时间屋企又结咗婚，慢慢学识放下执着，睇得开啲，因为我系金牛座，几追求完美，对自己要求高，有时会钻牛角尖，好在我有好好嘅朋友、家人同太太，有时好靠佢哋帮我。”
学识妥协
讲到Ben近年多次跟网友爆骂战，他认为自己不算火爆之人：“我系一个讲道理嘅人，识我嘅朋友知我系咩人，过咗去就过咗去，你今日问我（做法）会唔会唔同咗，我系成长咗，有啲位会有选择嘅话会多一个选择。有时唔能够自己嘅想法全世界都去配合我，包括我同传媒嘅关系，我都试过唔敢出嚟做专访，因为有时会放错重点，重点唔系工作，而系放喺周边，将唔好嘅嘢不断放大，当然回头一看得啖笑，但过程中我可能因为咁而冇咗好多工作。”
他称现已走出阴影及会调节跟网的相处模式：“我会同网民Friend吓，如果网民留言，我都会答吓佢开心吓，令个气氛融洽啲，如果好有恶意嗰啲，我都会尽量同佢Friend叫佢哋支持吓啦！”
