丁子朗拍剧唔识笑被粗口闹爆 半年冇工开想转行卖保险
艺人丁子朗19岁嗰阵就参加香港先生，成为三料亚军后入行，近年仲获力捧有唔少演出机会，仲升呢做男主角，不过入行以嚟佢嘅星途并非一帆风顺，佢日前接受陈敏之网上节目访问。
佢透露当初被家人反对入行，但系佢当年入读大学一年就放弃学业，由加拿大来港追梦，佢希望靠自己闯一番事业：“我读大学都有做兼职搵私己钱。最开心入行早年嗰阵父母嚟过香港探我，我可以畀到家用，畀咗啲钱佢哋使，唔想衰畀佢哋睇，你个仔喺香港唔系话捞得好掂，但过到活。知道入行后条路系漫长嘅，都希望最终系凯旋回归。”但系佢事业都曾经遇过迷失期，试过有半年冇嘢做，佢趁嗰段谂过转行，去咗考保险牌，佢觉得自己系个一定要做嘢嘅人。
佢入行初期亦受到受尽冷言冷语，不过佢并冇受到打击，仲将负评转化成推动自己发愤嘅动力，佢话：“试过有一次我拍剧，临尾收厂28、29（凌晨4、5点），争我一个笑容，佢要我笑，因为嗰时真系唔识做戏，我就系做唔到，笑唔得好，大家都好炆，大家等紧我。（即系唔合佢心意？）系，导演话不如嚟多次，现场就有一个工作人员就话，你擘大个口大家就收工啦！佢系咁闹我！（有冇粗口？）一、两个字，所以就觉得哗！（咁你咪好伤心？）好伤心呀嗰下，但呢一件事好好，令我记得到依家，令我每次返工都唔会阻大家收工，呢个系我希望做到嘅嘢，第二就系你做得唔好会令其他人受罪。”
