郭羡妮自爆选港姐原因 只因邓梓峰一句鼓励：佢话我嬴紧！ | 香港01
港姐出身的郭羡妮婚后减少幕前演出，近年更几乎绝迹电视圈，直至去年获邀拍摄ViuTV新剧《冥冥之中》，相隔多年复出萤光幕，郭羡妮日前接受郑裕玲（Do姐）主持商台节目《口水多过浪花》访问时就直言接拍前有开出条件：“因为我年纪真係唔细喇，我好坦白，我唔係嗰啲𡃁妹可以几日唔瞓，因为我以前chur过呀，我好惊呀，我唔想，我觉得瞓觉好重要对女人嚟讲，睡眠不足呢我根本就唔知自己做紧乜嘢，我连对白都记唔到你叫我演咩戏啫？咁所以我话我一定要有12个钟头瞓觉，咁我开出呢个条件佢话‘冇问题，我应承你。’”
郭羡妮今次久休复出，不少观众都大讚她的演出，而囡囡朱家爱（Kylie）原来都有参演，身为妈咪的郭羡妮亦表示支持：“我觉得未尝不可，同埋佢呢个角色係自闭症嘅，唔需要讲对白，呢个係一个好紧要嘅point，佢唔使任何training都可以做到，但係当然我喺屋企同佢讲好晒点样囉。我问佢‘想唔想做？跟妈咪去做呢个角色’，佢话‘好喎好喎’，佢都未细心谂过係咩，未真係知道拍戏係咩回事，佢净係知爸爸妈妈係拍戏嘅，但佢唔知道做演员係点样。我觉得可以畀佢出嚟见下人，去交流下，学下嘢呀，睇下合作性係点样啦，点样拍戏啦，你要听人哋讲嘢啦，要有耐性乖乖坐喺度，我觉得呢啲各样嘢对佢好有益处囉。”
现年47岁的郭羡妮是中英混血儿，入行前曾任职空姐的她，当年曾在机舱巧遇邓梓峰，她更在对方鼓励下决定参选港姐：“佢就话‘你点解唔参加香港小姐呢？我话畀你听你赢梗㗎。’其实一路都有人叫我参加㗎喇，之前嗰几年都有，even我做咗空姐，有啲老总呀，或者係高级啲嘅（人），都会话‘阿妹，你咁靓，你去选港姐啦。’嗰阵时我去考过警察，我去递Form，嗰个女警都话‘点解唔去选港姐呀你？做乜嚟做警察呀？’”结果郭羡妮在1999年参选港姐时以大热姿态夺得冠军、“最上镜小姐”、“国际亲善小姐”及“千禧才智小姐”奖项，翌年再夺得国际华裔小姐冠军，美貌令人惊歎！
