星岛网：黎耀祥确诊声沙睇好林敏骢拎视帝
老婆睇《轻‧功》太入戏晚晚睇到喊
黎耀祥在剧集《轻‧功》中饰演较真实年龄大的退休武师，要承受老伴离世的悲痛。58岁的祥哥唔忌讳，坦言似预演人生下半场，又指老婆梁耀莲（Julia）晚晚睇到喊，更跟他说：「畀你早走喇，因为将来得返你一个人会好惨。」戏里戏外都有几个货柜慨洋葱。另外，提到即将举行的台庆颁奖礼，祥哥睇好林敏骢，赞他「估唔到咁有惊喜。」采访：方骞平
现身在内地工作的黎耀祥接受《头条日报》访问时唔止声沙沙，唞气声仲好大，原来日前确诊新冠肺炎，仲传染埋老婆，两公婆现正隔离休息中，祥哥报平安表示病况向好，冇发烧，只系喉咙发炎好痛，仲不停咳嗽，中招头两日开唔到声，一开返声即做访问，十分专业。
预演人生下半场
黎耀祥𠵱家一年返TVB拍一套剧，继《杀手》、《拳王》后，他几钟意《轻‧功》呢类平实题材，会触动到观众：「我老婆睇见我喺剧中丧偶(龚慈恩)，晚晚喺度喊，感受到将来自己走咗，原来剩低个老伴系会咁样，渠会触景伤情，会睹物思人，呢啲情节好真实，拍摄时都觉得好似预演人生下半场，我睇返呢啲场口都会喊。」
祥哥坦言两公婆都会倾到生死问题：「太太话我个人太被动冇乜朋友，担心我会好闷好孤独，渠反而识得照顾自己，搵到生活乐趣，所以愿意畀我早走。」不过，两公婆暂冇预先安排平安纸及长生位等，他语带轻松说：「呢啲到时先算啦，既然都走咗咯，一把火烧咗渠，掉咗渠咪算啰。」
祥哥人到中年，现在一切随遇而安，抱住轻松自在、唔强求慨心态最舒服：「我好感恩，历史上边有艺人去到40几岁先做男一？𠵱家去到50几岁，不论经济、演出、家庭上每个层面都合格，讲真咁多年即使做配角及主角，心态上都冇乜分别，我觉得自己要有自己慨人生态度，演戏之余要有人生长远计划，现阶段唔系年轻搏杀时期，唔会系咁横冲直撞乜都做，反而会珍惜时间及工作量，希望做好唔同慨工作。」
冇信心四夺视帝
提到《轻‧功》得到年长及为人仔女慨观众共鸣，作为三届「视帝」的黎耀祥可有期望再夺殊荣？他表示睇好《下流上车族》的「车总」林敏骢，「呢啲咁平实慨题材唔啱争夺视帝，老实讲，每位对手做咗咁多年戏，个个都演得好好，问题系演到乜角色，林敏骢个角色咁有惊喜，观众喜出望外，系夺奖因素，加上林敏骢平日咁『无厘头』，估唔到渠拍认真戏，拿捏得咁好，令人感动，呢部份值得加分。 另外角色做得好同时，话题设定都要好，《下流》讲房屋问题，大家会有共鸣，所以一定睇重渠。至于视后十强表现比较平均，如果讲功力鲍姐(鲍起静)、江仪仪冇得输，而新一代演员有渠哋近一代慨演出方法。」
