星岛网：陳家樂連詩雅宣佈4.24舉行婚禮 婚紗照首曝光Shiga鑽戒閃爆晒幸福
陳家樂和連詩雅去年6月宣佈婚訊，但由於工作以及疫情遲遲未定下婚期，今日一對準新人宣布婚禮將於4月24日舉行，同時發放了3張婚紗照，分享兩人的喜悅。相中見到Shiga左手無名指的鑽戒相當閃爆，而且每一個pose、表情都充滿甜蜜溫馨的感覺，放閃程度爆晒燈！
陳家樂和連詩雅分別在香港和日本拍攝婚紗，「準新郎」陳家樂：「今輯婚紗相有幾個地點，其中一個係我哋啱啱拍拖曾經去過嘅一個沙灘，對我哋嚟講係有特別嘅紀念意義，所以今次再去返呢個沙灘，一齊睇日落、數星星，重溫我哋嗰陣種種嘅浪漫。」今次幫忙操刀婚紗照的合作單位來頭不少，全部都是各自陪着兩人成長的多年好友，當然要見證兩人走進人生新一頁，陳家樂說：「攝影師是我的同學，而造型則是Shiga的好姐妹，整個化妝、髮型團隊足足有二十多人，佢哋真係超級幫忙，影相嗰日有一種預演婚禮嘅感覺，內心好感動。」
連詩雅亦有在社交平台貼上兩人的婚照並說：「知道一直以來大家都好關心我哋既大日子，原來要籌備一個婚禮，真系一啲都唔簡單，所以想將事情安排得好一點，才公布日子，終於等到陳生，完成手頭上嘅工作，可以拍婚照，然後有張好好睇睇嘅照片一次過公布消息！好開心，今日終於可以同大家正式宣佈呢個喜悅，2023年4月24就係我哋Big Day啦！期待嗰日見到我哋親朋戚友朋友們見證我哋重要嘅時刻，到時見！！#要找到個喜歡陪我數星星睇動漫嘅人唔容易但係我找到啦#陳生辛苦啦」
陳家樂當然亦有貼圖，他笑說：「呢幾個月差唔多日日畀人問幾時擺酒，問到我鬼咁尷尬！因為我同未婚妻都希望可以準備好晒，影晒婚紗相，有張靚靚邀請卡， 先正式公佈，但偏偏呢幾個月又好忙，想放一日假都好難，成個婚禮嘅準備過程，基本上都冇辦法落手落腳去處理，好在未來陳太真係好叻，一個頂十個，好似打多份工咁，將所有事攬晒上身做，大如酒席、過大禮，細如老爺奶奶著咩衫都搞得掂，唯獨婚紗相真係要等我先影到，所以公佈嘅日子一拖再拖！」他還向朋友們預告：「炸彈陸續送到！」
