明报OL：马国明认《隐形战队》角色执二摊︰剧本好执三摊也不介意
马国明于TVB剧集《隐形战队》化身型男“Ocean”令人眼前一亮。他表示与《隐形》监制文伟鸿（Jazz）识于微时，当年仍是路人甲乙丙的他跟任职导演的Jazz已合作无间，但直至剧集《隐形》才有机会首次演出对方监制的剧。
马国明说︰“我冇问过点解，只係每次见面都会问点解仲未搵我拍呢？可能佢同陈展鹏合作开，我亦明白监制有自己班底，用开夹到就会一直用。虽然我都锺意演医生，但男人对枪林弹雨戏始终有情意结，对拍开枪戏有幻想。我从未试过拍剧实战开枪，《谈情说案》演警察都係谈情多，今次试过觉得好开心、好啱！真係扩阔戏路，以前警察角色全部吴卓羲做晒，次次都係佢做，我从来冇份，从未谂过自己可以做个咁有型嘅警察。”
盛传“Ocean”原属意陈展鹏演，马国明直认︰“当时我喺内地工作，唔知点解角色要搵第二个人做。Jazz搵我，我即刻唔再接内地工作返香港。原本个角色真係陈展鹏演，戏服全部写住佢名，我唔知原因，亦冇问。公司换角好平常，以前有啲剧原本係我做，最终都唔係我做。我唔会介意，做咗咁多年会明白，我从来唔介意执二摊，如果剧本好，要我执三摊都唔介意。”
马国明指陈展鹏客串演的奸角，在剧中是个很重要和特别的角色，相信对陈展鹏来说也很有新鲜感。相隔12年再跟陈展鹏合作，马国明说︰“永远估唔到佢会点演，今次佢仍然畀到我惊喜。”
第5次与唐诗咏演情侣，马国明称两人已很有默契，但今次他们的感情戏有很多衝突，波折重重。被问到现实爱情会否更助他入戏时，马国明说︰“从来唔会，通常都係睇剧本，跟剧本经历去做，尽量去投入角色。有啲演员会将自身经历嗰份伤心用嚟演戏，我唔锺意咁做，锺意跟住剧本给予嘅感觉去做。如果剧本写我喊，但感动唔到我，我会同导演讲呢场我唔喊，剧本对我好重要，唔会夹硬去谂好多嘢去唧滴眼泪出嚟，反而希望角色每一滴眼泪都可以触动到观众。”
马国明强调开工时会放下所有私人情绪，很少会带住不快事演戏。他说︰“收工返屋企再谂一件事，拍戏就会专注跟番剧本。我唔敢讲係专业，可能性格上可以咁做，私事好少影响到我工作。我係家庭摆首位，但开工时就工作摆首位。除非屋企人入医院咁大件事，否则有咩私人嘢收咗工先讲。”
与未婚妻汤洛雯的婚事筹备得如火如荼，马国明说︰“呢排拍开心戏ok，开心去开工，开心会容易表达出嚟，容易将开心传送畀观众。”自剧集《心理追凶》后再未与汤洛雯一同拍剧，马国明强调不介意再合作︰“我係惊佢介意，佢讲过依家仲点同我拍剧，惊会忍唔住笑。”
