星岛网：71岁程可为首公开被灵体索命险死 人生多奇遇遇贼入屋苦心劝收手
71岁的程可为(大姑)，两年前不获TVB包薪续约，入行逾50年已回复自由身的她乐得轻鬆。约大姑做访问，被她带住穿梭时空，21岁曾遇过令她毛骨悚然的撞鬼经历、51岁独居时被贼仔爬水渠入屋行劫，大姑自言做人行得正企得正所以都能化险为夷，她寄语做人要实际，唔好佔人便宜：“欠债个数冇得走係要还嘅，个天会睇住唔会入错户口。几多恐怖命案由爱到唔爱而动杀机，好危险呀。”
採访：方骞平 摄影：朱伟彦
“御用阿妈”程可为效忠TVB 50年冇变过心，当年有电视台高薪挖角3次都不为所动，但两年前改签一年一骚，感觉被公司“离弃”，不过明白到近年经济环境差，双方冇对错，目前已放下：“我唔伤心喇，TVB每年仲有一骚搵我，我一定会返去。”
连环恶梦获高人解救
一直循规蹈矩，多年来从未传出负面新闻的大姑有好多奇遇，她首次公开超恐怖撞鬼经历，“50年前仲读紧训练班，当时家住九龙城唐楼，有晚收工喺楼下闸口听到阿妈叫我乳名，之后持续6晚发梦都见同一副棺材，旁边有对男装尖头鞋，然后有把老人家声对我讲‘我好锺意你，想你做我老婆！’梦中我就同佢理论话‘大家係两个世界嘅人，而且无仇无怨，根本冇可能一齐…’”及后妈咪安排她到附近的诊所睇医生，靠食安眠乐安睡，但10日后停药恶梦再来袭：“嗰次佢仲叫我企上去花架，好彩我仲清醒知道咁样做会跌死，嬲到爆粗。”
但当时她已变到有气冇力，失魂落魄，阿妈再次畀钱她去睇医生，去诊所路上竟遇上一位“高人”跟她说：“你我相遇係缘份，睇你个样时日无多好论尽…”并教她返归叫阿妈去一个地方，做一啲帮她保命的方法。说也奇怪，一直唔信她撞鬼的妈妈见她声泪俱下，跪地求救后照“高人”说话去做，自此恶梦消除，不过，求救内容要一世保密。
唔信有一生一世爱情
问到遇上索命灵体是否跟“不婚之谜”有关？大姑唔敢肯定，但就一定跟信任有关：“𠵱家社会变化太大，出面引诱太多，自己都唔敢担保一生一世爱一个人啦，何况要保证对方爱你？做人实际啲好，一定要靠自己，唔好佔人便宜，几多恐怖命案由爱到唔爱而动杀机，好危险，唔好玩呢个游戏。”
劝贼仔勿再挺而走险
另外，大姑又于31年前试过家中遇劫：“嗰晚个贼等我瞓咗先爬入屋，入房拍醒我，我装作镇定摸黑行去客厅畀咗7万几现钱佢，直觉觉得佢对数字几满意，感觉佢唔会伤害我，对方讚我镇定仲要求同我倾偈，我就劝佢回乡做啲小生意，唔好再挺而走险，仲打开大门畀佢离开，佢坚持喺边度嚟就喺边度走，我喺房睇住佢爬渠九秒九落返地下，好惊险，事后我都冇报警，但吓到对脚係咁震。”大姑冇打算退休，现阶段好享受人生：“我畀得起钱食嘢及揼骨，想开工又有人肯搵我，我好满足㗎嘞。”
