星岛：泰臣善用观众缘搞网台 以为TVB易主多机会最终失望离巢
泰臣日前出Po自爆离开效力10年的TVB，对于离巢引起迴响都话估唔到。他坦认因爱演戏而签约TVB，但机会一直不多，年前TVB易主以为有转机，最后依然令他失望，决定外闯搵更多出路。泰臣即将为港台主持游戏节目及演出舞台剧，还计划搞网台及网上商店，瓣数多多。採访：杜杜
泰臣跟TVB只签普通艺员约，6月约满前公司有搵他倾过，不过年前易主令他看清现实，“当初觉得公司有啲转变，係有啲机会，但转变唔係好大，撞啱呢3年疫情大家都痛苦，真係会令人谂一谂，加上传媒朋友成日提住我几多岁（47岁），呢两年又不停教班令我多咗反思，离开会活跃啲，有多啲唔同养份，个样都会精灵啲。”
怀念台前幕后人情味
泰臣出Po纯粹想整理10年来工作的照片作小总结，没想过引起迴响，“冇谂住大事宣扬完约，咪将啲相剪埋一齐好似见到自己嘅成绩表，发现同台前幕后真係合作得几开心，睇到啲分数都算对得住自己，有提名，又有前辈讚过，都要毕业啦！”泰臣最不捨是一班好同事，“怀念嗰份人情味，遇到好多好好嘅同事，工作气氛係好好嘅。”
讲到未来计划，泰臣将为港台主持跟聋哑人士一齐玩的游戏节目《有声冇声讲你听》，以及下半年演出以香港情为主题的轻鬆写实舞台剧。他坦言仍期待遇到好角色和好剧本，“剧集定电影都无所谓，咩单位都可以，当然TVB有合适都欢迎。”
另外，泰臣依然好享受教戏剧班跟志同道合的人分享经验，还会努力经营网台及跟朋友开网店，善用自己的观众缘，“我去健身成日见到个清洁姐姐，佢同我讲话见到我就觉得好好笑，原来自己真係有亲切感带到欢乐畀人，喺网上平台应该会用得着。”
