朱智贤离巢无线内心多番挣扎 致每晚失眠：烦咗好耐 | 香港01
朱智贤（朱朱）早前宣佈离巢TVB，结束十年的宾主关係，正式回复自由身。今日（27/10）朱朱和陈思圻（Vicky)齐齐现身元朗为HOY TV 《炼狗术师III》开工。
她接受《香港01》访问时表示：“其实我同Vicky係同届港姐，我哋都识咗十年咁耐，今次出返嚟之后，我哋又一齐做嘢，遇返一个相熟嘅朋友，感觉好有归属感。”Vicky接著说：“今次大家能够撞返，感觉到大家都成熟咗。之后嘅路就要靠自己，要为自己将来计划打拼係冇得懒，咁所以要更加努力去做好自己。”
对于现在回复自由身，凡事都要靠自己出面主动𢱑捞，朱朱笑言：“其实本身我个人唔係一个锺意应酬嘅人嚟，同埋比较宅，锺意坐喺屋企，咁变咗呢排係出多咗去见人，因为明白到唔能够日日坐喺屋企度等运到，咁变咗自己係要主动啲接触唔同嘅人，睇吓有冇其他工作机会。（离巢原因，係咪TVB改签一年一个骚，你唔续约？）哈哈！咁唔同年纪追求嘅嘢唔同嘅，以前就会好多嘢都好想去尝试，但去到呢个阶段，我都要生活，都要为自己负责，同埋都会反思自己人生会有啲咩突破同成就，咁所以我就决定一试。”
朱朱透露当初下定决心跳出comfort zone时，内心经过多番挣扎：“当时我为咗呢件事我係烦咗好耐，我一直都瞓唔到，睡眠质素好差，每晚都係咁去谂，谂咗好耐，因为我本身係一个好犹豫不决嘅人，咁所以我好难去决定。于是我问好多人意见，但原来问完之后，仲烦咗。咁到咗最后嘅阶段，我就静静地咁去谂，最后就鼓起勇气去行呢一步，都係抱住个心态，死就死啦。”
