台庆颁奖礼｜周奕玮麦美恩膺最佳男女主持
周奕玮（Jarvis）、麦美恩（Mayanne）在《万千星辉颁奖典礼2023》分别夺得“最佳男、女主持”。
Jarvis领奖时说︰“多谢TVB，多谢所有投票畀我嘅观众，多谢好多由细睇到我大嘅观众﹗首先，好多谢总经理曾志伟先生，好多谢你喺我好迷惘嘅时间畀咗好多鼓励我，好多谢你旧年畀咗一个令全世界都可以睇到我有一次展现自己机会嘅舞台，同埋好多谢你相信我。我知道自己有好多缺点，多谢你包容我﹗好想多谢娱乐新闻台，我入行第一份工就係做娱乐新闻台。嗰阵时，我仲係一个细路仔，乜嘢都唔识。我做咗18年，今日係第18年，我终于可以攞到呢个大个仔嘅成人身分证畀番娱乐新闻台。我好想讲一句，我第一次入行做康城影展时著住一套‘踢死兔’採访红地毡，之后好多人话做乜搵个企鹅去採访红地毡。咁多年来，我听过好多次啲人话周奕玮係一个冇身形、冇外形、冇台型嘅人。我谂我今日人生得一次呢个机会，可以揸住呢个奖讲一句，我想同好多曾经怀疑过我嘅人去讲一句，唔好畀人哋对你嘅想像限制你自己对自己嘅想像，我会继续想像，继续成长﹗”
Mayanne知道得奖时感动得眼有泪光，一上台就请工作人员送她纸巾。Mayanne说︰“多谢公司畀我讲我想讲嘅嘢，因为大家只係见到我嬉皮笑脸。我係TVB凑大、TVB养大，呢个奖係一个个人奖，但后面好多人推动呢件事。我係好少数可以同好多部门合作嘅艺人，我可以企喺度唔係因为我一个人嘅能力，而係后面有好多人令到呢件事发生。有人话TVB係一个木人巷，我觉得係一个梦工场，因为发梦你都谂唔到一个竹升妹可以用12年时间去成为大家认可嘅、用全中文嘅大骚司仪。公司好大胆同勇气，畀呢个竹升妹做做吓司仪，去咗拍古装剧。呢间公司后面有好多人帮紧我，呢间公司有好多高层，但係传统上我要多谢曾生（曾志伟 ）、珍姐（曾励珍）、乐小姐（乐易玲）。係呀，係要讲㗎﹗呢个奖，好多人觉得係要表扬我过去1年嘅努力，但係对于我嚟讲係一个接棒仪式，因为呢1年嘅压力同责任係大咗。曾生，我希望我用最短嘅时间将呢个棒交畀新一代嘅金牌女司仪。希望大家帮帮手，因为女司仪係要有好多人一齐去合作同互相扶持，大家先至有好节目，因为得益嘅一定係观众，多谢大家。”
