星岛：周吉佩《中年》封王9个月吸金过百万 经历16年低谷有钱尽搵狂接100个Job
去年4月，周吉佩(吉吉)在《中年好声音》封王，人气急升，除出新歌《你是我唯一的》外，仲有份角逐TVB台庆“飞跃进步男艺员”，虽然最终落败。咸鱼大翻生的吉吉见过鬼怕黑，封王9个月，把握机会不断接Job，商演及广告接近100个，进帐7位数。曾经历16年低谷日子，吉吉要争取时间搵钱：“做得几多就做。”
採访：方骞平 摄影：朱伟彦
周吉佩之前推出新歌《你是我唯一的》答谢朋友、家人及“吉s粉”(fans)，更凭歌寄意冧太太黄彦欣。不过，因为太耐冇入录音室，首天录音时投入唔到，第二天用老婆做感情投射对象，感激太太陪他走过人生高低。对于短短9个月快赚过百万，更省靓《中年》招牌。
吉吉却谦称：“骚量係计埋TVB演出，所以唔係全部都有好多钱嘅。”他笑言其实(收入)可以再好啲，又称重返乐坛发展好满意，除咗有得出歌，仲有得跟李佳芯做综艺节目《日本18种住法》，比预期中演出更多。”
音乐中心佔地千尺
吉吉重申冇真正计算过赚到几多，酬劳全归太太揸数：“不过，管家婆太太心裡有数，如果我赚唔到过百万，都唔敢发到咁大，畀我投资6位数扩充音乐中心，佢咁做都係想我可以搵多啲钱。因为冇人知将来会点？歌唱事业几时会玩完？挟著过去嘅不安全感，𠵱家做定两手准备。”
吉吉除装备好自己，珍惜每个演出外，更视教育中心生意为长线投资：“新嘅音乐中心1000呎，较旧舖大咗7至8倍，仲请埋《中年》参加者做星级导师，都算係实现咗一个小小嘅心愿，长线係想太太做全职主妇。”
努力跑数收落雨柴
现时两公婆拍住上，太太全职打理刚开幕的音乐中心，将来连receptionist都捞埋，吉吉就要配合努力“跑数”，最基本要搵返每月开支及老婆份人工，他承认会有压力：“计埋供楼及两个小朋友支出，每月最少要4万几，真係有太多开支嘞，以前冇头家，会倾家荡产买枝几万蚊嘅结他做好音乐，唔理入不敷支，所以穷得有道理；𠵱家有钱都要悭住使唔会用到尽，会好天收埋落雨柴，更唔会先使未来钱。其实由太太管数都好，可以乜都唔理默默做，睇返好多成功人士係由太太管钱。”
吉吉自言做人好简单，唔介意开心穷食三文治：“有时间陪到仔女已好好，有时凌晨回家会被投诉，佢哋唔锺意我做‘明星’，但有时见我被拉住影相，又觉得爸爸有人识都几得意，我就乘机教育佢哋‘爸爸唔係威，只係职业关係有人认识，最重要做好自己，等同做好功课一样。’”
