星岛：胡蓓蔚唱歌被豹哥闹到怀疑人生 结婚16年相处靠互踩保鲜
演戏唔多嘅胡蓓蔚（豹嫂）在新剧《旁观者》中饰演王敏奕妈妈，真摰母女情好有发挥，拍到惨情场口时会爆喊。但豹嫂却未获老公单立文(豹哥)讚赏，更常被拨冷水：“佢会弹我‘睇吓你几多演戏痕迹！’其实佢演戏都有改善空间啫。”最惨唱歌都被老公闹走音，难得豹嫂越闹越唱，原来两公婆的保鲜方式係互踩，好搞笑。
採访：方骞平 摄影：谭志光
胡蓓蔚在剧中有老中青阶段，年轻时沉迷恋爱，同时有9个男友，由于漠视女儿王敏奕，王敏奕对她又爱又恨，最终爱得太迟。豹嫂称虽然戏份唔多，但过足戏瘾，更碌人情卡搵袁伟豪客串做其中一位男朋友，揸电单车接她去拍拖。
叫王敏奕做老师
豹嫂私下会称呼王敏奕做老师，提点她声线、节奏、走位等：“我哋由互不相识到产生莫名其妙的火花，仲做埋好朋友，拍到伤心位时唔可以互望，因为一望就忍唔住爆喊，有场戏佢镜头内外都喊到晕，真係一位好劲嘅演员，仲会成日鼓励我。”
相反老公常拨她冷水：“尤其玩音乐，佢有一个严格标准及要求，会好恶踩到我无地自容，如我喺屋企练歌时，佢会大声痛斥错处‘走音’、‘低咗(音)’、‘(音)唔准’、‘尾音震’、‘冇气’…即使我唱歌出身都会令我怀疑人生，究竟係咪唔识唱歌？试过惊到要趁佢唔喺屋企先敢练歌，𠵱家佢越闹越唱，要佢闹到唔好意思，收声话‘好啲’！可能我平时成日管住佢饮食，哦佢食得唔健康，所以有机会就入我。”
豹嫂还会动脑筋“食住”豹哥：“佢朝早6点起身开工呻惨，埋怨我瞓到隻猪咁，我就答佢，冇计啦我嫁得好，佢唯有陪笑，再答唔出话来，哈！”两公婆拍拖11年、结婚16年仍sweet到爆，更无悔唔生B：“自己决定冇得后悔。”
