星岛：詹天文笑住担心唱Live搞唔掂 首出跳唱歌唔识死加强跳舞难度
詹天文（Windy）一直恨唱韩式跳舞歌，早前终达成心愿推出第2首派台歌《大雕刻家》，无论曲风同歌词都是她梦寐以求，又唔识死要求排舞师排得劲啲，搞到担心将来唱Live。期望可以攞到新人奖的她，如愿在新城颁奖礼得到“劲爆新人奖”，令她开心有圆满感觉。
採访：杜杜 摄影：罗安强 场地:Studio Meta
Windy知道有机会出韩式跳舞歌劲兴奋，最难得连歌词都好中，“监制问我想要点样嘅歌，我冇咩头绪，一听demo就係我好想要嘅嘢，最难得连歌词都好中呀！譬如‘18岁如何靠支撑’我就快18岁好连繫到，仲有‘I won’t be down，I won’t get down at all ’都讲紧我性格，我係唔容易被打倒，歌词都表现到出嚟。”
组合个人新人奖攞晒
首次推出跳唱歌，Windy都有一定压力，尤其是唔识死要求排舞师加强舞蹈难度，“最初排舞老师係排得比较柔和，我觉得好似唔够劲，就要求劲啲，佢就话‘咁我唔理唱歌嘞喎’，结果出嚟真係好劲，所以MV出嚟效果好好睇。”
不过她完全冇预计唱Live时，可能会出问题，“真係要唱Live，可能都要调整少少动作，令到声音更加稳定，如果唔係真係灾难，所以都有少少担心，哈哈！”
举行乐坛颁奖礼前，Windy对夺奖已有少许信心，最终成功夺得新城“劲爆新人奖”，她开心有圆满感觉，“可以企上颁奖舞台，已经觉得好荣幸，𠵱家After Class 攞过组合新人奖，个人都攞埋就更加圆满，真係非常开心。”
得奖后，她已计划再推出新歌，更希望能像其他“声梦”伙伴一样，到外地拍MV，“我谂紧下首歌可能试R&B曲风，最想去奥地利拍MV，我去过旅行觉得嗰度啲景好吸引，仲有份好奇怪嘅熟识感，仲可以顺便旅行就最好。”
