星岛：刘佩玥突失声被吓坏决心变阿佘咁Fit 刘颖镟望龙年挑战飞机师角色
刘佩玥（Moon）和刘颖镟（Tiffany）在兔年过得相当不俗，前者首次在颁奖礼打入“最佳女主角”5强，同佘诗曼拗手瓜；后者4度提名“飞跃进步女艺员”终首度夺奖，爆喊感谢父母是最强后盾。展望龙年， Tiffany望继续突破挑战机师角色；34岁Moon自爆颁奖礼时突然失声，吓坏的她认为是身体响警号，今年决心要搞好身体，望似佘诗曼到48岁都一样Fit。
採访：杜杜 摄影：朱伟彦 服装:Suncoo HK(Tiffany) 场地:The Salted Pig (MegaBox)
兔年首夺“飞跃进步女艺员”奖，Tiffany当然满意又好开心，“今年好幸运攞到呢个奖，经历咗呢7年努力有呢个奖，原来真係好开心好感动。”连续4年获提名才得奖，她承认原来感受比想像中更大，“冇谂过会咁感动，攞嗰刻真係咩情绪都出晒嚟，个奖係飞跃进步，代表性係观众认同我真係有进步，係自己最想做到嘅嘢，嗰刻好安慰。”
正向心态面对负评
Tiffany坦认因知提父母时必变喊包，台上讲感言时刻意安排最后才答谢他们，“父母永远係最大后盾，无论你做咩都好，佢哋永远係咁支持，加上呢个奖嘅代表性，好多感受即刻涌晒上嚟，到父母点样支持我，呢刻先有咁嘅奖励，真係好多嘢谂。”她回想当年选完港姐，毅然放弃读大学回港发展，亦得到父母支持，“佢哋唔畀压力我，呢样嘢好帮到我，畀我尝试，只要係做紧自己锺意做嘅嘢。”
Moon又大讚Tiffany工作态度认真，得奖实至名归“佢嗰种勤力，同埋想做好1样嘢嘅决心、热诚，我係好欣赏。”Moon又认为大家心态好相似，不太担心负面评价，“佢睇完会问我，呢啲嘢係咪可以好啲，真係想做好啲，而唔係纯粹觉得有人闹自己。”Moon欣赏Tiffany，从对方得奖时她喊到变猪头可以证明，“原来见住一个自己嘅朋友，好欣赏拍档攞奖係咁开心，（林）子善仲有隔离呢个，嗰种喜悦真係开心过自己攞。”
兔年Moon同样好充实，最难得当然是“最佳女主角”打入最后5强，“对我嚟讲好有意义，不论係观众定公司都一路好支持我，去到10年呢个位，依家要谂点样喺更加短嘅时间里面再做得好啲，唔可以停留喺一个level。”去年夺得“马来西亚最喜爱TVB女主角”奖的她，又认为得奖有鞭策作用，“奖项係跟我一世，我唔可以比起嗰时嘅我退步，要谂点样维持之馀，点样可以做得好啲，嗰个压力係有喺度，亦都要喺度，畀自己压力推动去做。”
望孖住拍旅游节目
展望龙年，Tiffany希望挑战多些不同角色，早前在《飞常日志》做过索空姐的她，希望有机会挑战飞机师角色，“做机师几得意，以前好锺意睇《衝上云霄》，好神奇，可以嗰机师位度，有咁多掣任我控制。”而做过真空姐的Moon，却想做飞机维修员，“我好想去维修嗰啲地方，我以前做空姐冇机会落去。”Tiffany亦想财源广进，“冇话想买咩，但真係想搵多啲钱，自己储或者畀屋企人都好。”Moon就笑言会用吸引力法则，吸钱埋身，“我係好爱钱，钱会好爱我，我啲钱会源源不绝咁嚟，每日都会咁样同自己讲。”
踏入龙年，Moon最想身体健康，因兔年实在太多病，“小病又好大病又好，睇医生出入医院太多次，当然唔係每次都同大家讲，知道要做啲嘢，希望会有成绩畀大家睇，亦都要畀自己同爸爸妈妈见到，每次我病佢哋係最担心，真係好不孝。”
她更自爆颁奖礼时，经历人生第1次失声，认为是身体响起警号，“嗰日我係变咗另外一把声，讲唔到嘢，非常担心，冇试过咁样，会唔会之后就係咁样嘅声，讲唔到台词，唱唔到歌，做唔到嘢。”
她睇完医生都未见好转，感到好无助，“试过针炙又试过食药，都未开到，我喺网上查真係有人係会永久失声㗎！虽然见我冇乜嘢，如果话畀你听个报告内容某啲数字，係几担心，有啲数字都会吓一吓。”吓餐死的她要决心搞好身体，更认为在幕前发展是必须，“见到（李）施嬅、阿佘（诗曼）同（胡）定欣，我会觉得唔得啦！係时候要keep自己身体健康，如果依家都仲唔去努力做呢样嘢嘅话，点样喺佢哋年纪时候，仲keep到咁靓，咁 fit，状态咁好。”
这对双刘好姊妹，又希望今年可以一齐拍旅游节目，两人更积极帮一众监制谂好远近的目的地。Tiffany兴奋话：“我哋首先去个近嘅，跟住再去个远嘅，近去日本滑雪，远就你拣嘞！”Moon畀Tiffany拣去希腊、瑞士及冰岛，Tiffany最后选了冰岛，Moon又不介意到时派福利泳装上阵，“如果我去返参加港姐个身形，我OK㗎！”
