星岛：罗子溢隔空狂冧杨茜尧：我唔识浪漫但会白头到老
陈自瑶拍《婚后事》有感而发论男人出轨
罗子溢和陈自瑶（Yoyo）在《婚后事》再演夫妻，因为剧集够爆画面够踩界而被网民追捧，两人均大讚对手好剧本好，才有好成绩，特别是入行19年的子溢，得到“私人视后评审员”老婆杨茜尧肯定：“今年有机！”，更首次听到有望衝击“视帝”的讚赏，佢笑言当自己攞咗，非常好笑。而同样获讚的Yoyo，再三澄清并非本色演出，疯狂嗌“离婚”纯剧情需要。两人更大谈婚姻及出轨论，子溢隔空狂冧老婆，又甜又好笑，真係恭喜晒罗太。
採访：杜杜 摄影：Stanley 髮型:JanChiu@IL Colpo 化妆:Evelyn Ho 服装:@Sandro
子溢和Yoyo相隔13年再合作《婚后事》，两人大讚对方成熟不少，默契更胜从前。首任女一的Yoyo，压力好大，庆幸拍档是子溢，“第1次做咁重要角色，情绪波动好大，好难演绎，唔知人哋觉得你得唔得？播出之前好紧张。”而拍了10几年剧的子溢，觉得角色好有发挥而特别珍惜。
子溢唔敢同老婆睇亲热戏
剧集播出后反应极佳，内地观众亦给予高度评价，两人都好开心。Yoyo觉得最感动是引起观众共鸣，“话‘你演活咗好多女性心声’，有啲写埋长文讲亲身经历畀我听，睇到好感动又心痛。”而子溢的信心除来自观众，还有他的“私人视后评审员”杨茜尧，不过亲热戏就唔敢跟太太一齐睇，“我比较胆小，哈哈！第1集有啲讚赏声音，我就话‘老婆你不如望一望，觉得有咩改，或者好唔好，客观啲话畀我听’。”
结果太太睇了半part已有结论，“老婆”Yoyo嫌他讲得唔清楚，索性罗太上身代为转述，“做得好好呀，得㗎嘞，今年有机！哈哈！”子溢笑得劲冧：“佢话今年有机，我话多谢视后多谢视后，哈哈！”
子溢坦认一向好重视太太的评价，得对方肯定就好有信心，“周围问人‘有冇睇套剧？’”对于有否信心衝击视帝？子溢就不强求，“梗係想啦！坦白，唔係清高，都係随缘啦！”入行19年首次获得大量讚赏，令他好有成就感，“有人话‘佢食咗咩药，突飞猛进’；‘呢个可能係罗子溢代表作’，令人好开心嘅留言，咁多年未睇过留言有‘视帝’出现，我以为自己攞咗嘞，哈哈！”
Yoyo同样认为有口碑较夺视后宝座更直接，“好多留言支持、鼓励同讚赏，话我做得好好，‘视后级演技、等你攞视后’，要得到观众认同好困难，得到已经好开心。”
Yoyo强调跟剧本咆哮演绎
子溢表示首日开工拍法庭戏，状况比想像好，觉得“好老黎”，更认为当父亲后亦有助投入角色，“做咗爸爸，睇对白个心已好痛，幻想真係拎走我个女，真係心如刀割，但又要放弃。演得咁真，因为动咗真情！”Yoyo笑指当日要奋力应接子溢视帝级演技，“嗰日我嘅状态係差啲，都尽咗力，唔係点接到佢啲戏呀，哈哈！”跟老公王浩信屡传婚变的Yoyo，指老公因开工冇时间欣赏其精湛演出，并澄清演得投入并非亲身经历，“成日问我係咪本色演绎呀？又或者係咪同真嘅一样？其实我真係忠于剧本去演绎咋！剧本点写我点演。”
她又以疯狂嗌“离婚”获讚一幕作例子，“嗰场係咆哮唔係尖叫，使唔使咁激烈呀？！剧本真係咁写，我忠于原著3句‘我要离婚’，后面括住‘咆哮’，真係尽力去呈现，最真实嘅‘张明芯’。”
子溢妙答精神及肉体出轨
剧中经常提到的精神及肉体出轨，问到那种最不可原谅？Yoyo认为要睇情况和程度决定，“有时男人见到个靓女倾多两句，会有嗰吓思想上出轨，但係佢识唔识好快咁收返？要知道界线，识得收，如果纯粹同靓女倾吓偈，有一刻谂吓，人之常情，好多人都会接受到，但当你真係爱上嗰个人，甚至肉体都出埋轨嘅话，就接受唔到。”
子溢就直言精神和肉体出轨同样出事，“最紧要唔好畀人知，畀人知两样都大镬，哈哈！”Yoyo强调感情唔係睇钱，“要睇到你对佢嘅爱，你有冇心，处女座都几讲心唔讲金。”跟太太同样是处女座的子溢，相当认同。他追求细水长流，平淡过一辈子的婚姻，“我非常唔识制造浪漫，或者搞仪式感，但我相信最后会白头到老，临离开人世仲可以拖住嗰个女人，呢个先叫做爱情，爱情唔係一刻，係成段人生。”
Yoyo大讚好浪漫，但他笑言杨茜尧另有想法，“我老婆贪心啲，又要你咁谂，又要仪式感，slogan嚟，哈哈！”他更自爆去年跟太太结婚7周年，太太有要求，“佢好单刀直入‘7年之痒喎，有咩搞作’，我相信处女座嘅女人，唔係要你付出啲乜嘢，睇到心思同埋着紧佢就够。”
