星岛：冯素波离巢最唔捨得张员工证 TVB冇责任养你一世咪当长期饭票
79岁冯素波上周在社交网公布已离开TVB，对于离开合作超过30年嘅电视台，波姐并冇依依不捨，但就好留恋张员工证：“好多同事都走咗啦，而且前两年都係改签一年一骚，冇工作唔使返去，所以同公司冇乜关係，跟高层更加冇乜感情，员工证似member card可返去食Tea探吓朋友，𠵱家最可惜係连会籍都冇埋。”
採访：方骞平 摄影：邓国良 场地：Colour Brown
冯素波当年由冯美基喺亚视挖到TVB，12年前曾转投王维基旗下的香港电视网络，两年后获曾励珍力邀重返TVB：“每年续约都係艺员科同事跟我倾，我同高层唔熟，乐易玲唔会理到我呢啲层次。”
王维基身上得益良多
波姐忆述电话中“分手”一刻来得乾脆俐落：“艺员科同事打嚟，我斩钉截铁话第日都係好朋友，对方冇挽留反而尴尬话‘咁有需要时你会唔会返嚟拍戏？唔会嬲我哋呵？’我爽快答应唔会闹TVB，因为都做咗几十年啦。”
波姐又发表“助养论”：“其实千祈唔好当TVB係张长期饭票，有责任要养你一世，即使养大个仔都唔会养到你死啦，就算佢得我都未必肯，可能出面有更大发展呢，正如当年王维基招手时游说我出去睇吓，佢话我‘儘管有把遮挡雨，但太大雨都顶唔顺会湿身，其实你好有价值’，唔出去係唔知道自己嘅潜力，喺佢身上学咗好多嘢，原来个世界係咁。”她反而最唔捨得张员工证，会收起留念，未来会出自传及申请做粤剧及个唱。
她明白今时今日TVB已改制：“而且年纪越大，剧本唔会再为我而写，演出戏份唔会多，呢啲角色大可以留畀包薪艺员做，畀机会佢哋跑数还骚，呢啲係佢哋做生意方法，只要谂得通就明白。”
她又提及两年前一件趣事：“综艺组话公司会开新节目畀机会我发挥才华，佢哋接见我时，追问我可以有乜发挥？我忍唔住反问：我喺呢间公司30年，入得嚟一定有才华唔通白支人工咩？係佢哋唔了解每个艺人，其实喺TVB个个演员都有才华，就算路人甲乙丙都係称职嘅。”
