黑色月光｜杨茜尧内地拍剧两个月感内疚：大女问我多啲陪佢得唔得 | 香港01
杨茜尧今日（11/4）现身尖沙咀出席TVB剧集《黑色月光》煞科宴。茜尧受访时表示：“其实拍完呢套剧之后，係有少少失落，係因为可以係完全放鬆嘅状态行开工，个人係好开心。因为平时要凑小朋友嘅关係，成个人嘅精神都落咗係两个小朋友身上，变咗我係喺屋企唔化妆，连有白头髮我都唔会去染。但到我出返嚟拍剧之后，因为要用最好嘅状态见大家，我就会注意返自己嘅仪容，会执返得靓啲，变咗成个人嘅状态又返番嚟。”
茜尧又指因在内地拍剧，长时间与家人分开，内心感到非常内疚：“虽然出返嚟拍剧，做返自己锺意做嘅嘢，个人係会开心咗好多。但呢近我要抖一抖，因为我怕我嘅小朋友唔认得我，就好似呢套剧我喺内地拍咗两个月，试过返嚟见大女“小珍珠”嘅时候，佢就会问我点解成日唔喺屋企，又会话我你而家又走？我话係呀。然之后佢又会话你可唔可以下次唔好去咁耐，你可唔可以留喺屋企耐啲，多啲陪我得唔得？佢又会讲我唔想你去，你叫爸爸去做嘢啦。所以我听到之后，我係好心酸，觉得好内疚，好对唔住佢哋。始终小朋友好快大，咁所以我都要係工作同小朋友之间作出平衡。”
