星岛：林秀怡梁凯晴狂食增磅又便秘超惨 彭慧中拍《吃货》逾10日食近70餐
彭慧中（Phoebe）、林秀怡和梁凯晴主持的《吃货横扫深圳》，不断食兼大骚靓身材，观众睇得过瘾，但三女有苦自己知，因为她们在深圳拍摄10多日，每日食足6餐，为节目增脂都叫值得，但最惨秀怡和晴晴“有入冇出”，成程Keep住便秘肚谷谷。另外，三女虽然首合作，但拍得开心，希望未来转战其他地方延续吃货旅程。
採访：杜杜 摄影：Stanley
首拍饮食节目的晴晴觉得好新鲜，想不到自己有此吃货实力，“一日拍3、4间餐厅，加埋中间放饭再试其他嘢食，不断食，冇谂过自己食到咁多嘢。”最惨即肥4磅，仲便秘𠻹，“头几日去唔到厕所，饮西梅汁都唔得，要着泳衣拍摄嗰日劲担心！”两位师姐大派定心丸， Phoebe说：“佢都不知几靓几fit，谂多咗之嘛！”
要猛男唔要陆浩明
贵为“流行都巿女神”的Phoebe，上辑《扫泰国》狂着泳装，秀怡爆她今次更激，“佢直情冇着！哈哈！佢要做spa，仲有晴晴陪佢！”同属有料之人的秀怡竟然免疫，“导演有话要着！我仲带咗7套泳衣，佢见到我真人就话算，淨係叫佢哋着，哈哈！”
她认为是不幸中大幸，“我有便秘搞到肚凸咗出嚟，成10日都去唔到，返到香港先得，可能每日拍到夜晚10点先返酒店，宁愿瞓好过坐厕所。”Phoebe好同情：“好惨，帮佢谂咗好多方法都唔得。”
最有经验的Phoebe分享拍饮食节目小技巧，“拍食物时千祈唔好食住，真係拍食嘢先食，冇咁易食太多，亦都试到最新鲜感觉。”她亦不担心讲食后感会词穷，“用表情搭够，等观众睇到我个样就知有几好食。”
她又希望《吃货》系列能长拍长有，“依家日元低，可以去日本拍，欧洲都好，我未试过去咁远拍饮食节目。”听到有得飞外地，秀怡和晴晴劲雀跃，仲想搵猛男陪飞起陆浩明，“帮手拎吓嘢，仲可以骚肌肉，等女观众都开心吓。”
