星岛：向展鹏首揭跟车婉婉恩怨始末：佢个人好差
《中音2》输唔起晕低7次撞到面瘫
去年11月，《中年好声音2》60强止步的向氏家族后人向展鹏（Jeffrey）因在谢师宴上被车婉婉无礼顶撞，嬲到离场，之后返家饮酒兼出PO发洩。虽时隔半年怒火已熄，但仍然缺席“中2生”毕业晚宴。Jeffrey首揭屈埋喺心半年的不快，强调唔啱自己嘅地方就唔会再去，自己搞私人Party唱吓歌仲happy。
採访：方骞平 摄影：邓国良 场地：Gentry club
长辈劝告勿参加《中音2》
至今Jeffrey对被淘汰仍然耿耿于怀，“当晚我的确係喉咙唔舒服，唱得唔係几好，但都有3盏灯呀，唔明4灯嘅黄剑文点解唔拣得2盏灯嗰啲，可能佢见我面青口唇白啩！唉！命运注定赢就赢，输就输，事后啲出局参赛者，话要搵我倾诉畀我婉拒咗，大家都係唔开心嘅输家，唔通揽住喊咩。”
去年Jeffrey花了4个月时间筹备参加《中音2》，岂料60强已被foul出局，跟预算能打入20强有落差，坦言输唔起更有后遗症：“当晚返屋企饮咗酒跣亲，跌到膊头、膝头半边身都爆晒缸。”自此他分别于唔同时间晕倒7次，“晕时半边身会突然冇力，所以唔能够用手撑住落地，搞到右边面撞落云石地面，𠵱家仲有啲麻痺，但体验报告一切正常，医生估计係压力太大引起，所以冇药食。”
之后Jeffrey有参与9月份生日会及11月份的谢师宴，直至近期的“中2生”毕业晚宴就唔见影，他坦言去完谢师宴发生“车婉婉事件”后，红尘已被他看破，觉得唔啱玩就唔会再去，更语带相关举例：“我经常望到楼下个宠物友善花园有小朋友跌亲，或者被狗咬，有过唔好经历，佢哋都唔会再去嗰个公园啦。”
语毕他补充：“但唔好投射狗係边个？边个被狗咬？只係举例。”Jeffrey坦言由始至终家人、朋友、长辈个个都反对他参赛：“佢哋次次都会话‘向公子你都傻嘅，你有自己嘅世界，唔应该去嗰度囉，唔啱你㗎，你会后悔！’其实我只係觉得唔啱玩啫，亦都冇后悔，最重要享受过程，佢哋係长辈，年纪大啲再看破红尘多啲，咁讲係想保护我，知我一定会撞板及唔开心，好似坐渡海小轮都分上下层啦，我唔会坐下层。所以我打后搞咗场迷你音乐会，可以自己话事，唔使人认同我。”
然后Jeffrey返到屋企饮咗酒就出咗个po，插女方扮嘢又寸。“咪饮咗酒出事囉，酒后会将啲未消化嘅嬲怒发洩出嚟，所以今次访问我只饮汽水，哈！不过，瞓醒我经已马上del po，我同婉婉根本冇乜事，呢啲误会成日都会发生，都同佢讲返声‘唔好意思’。”另外，参赛后Jeffrey推咗唔少Job，他笑说：“60强止步都算係咁啦，未来有机会开公司自资出碟，既然畀得起，咪做自己锺意嘅嘢囉，都係保险以外唔同嘅尝试。”
