星岛：何雁诗乐观面对囝囝残疾：可能10年后研发到药物呢
两公婆曾揽住喊互问“咁点呀？”
何雁诗（Step）和老公郑俊弘（Fred）最近公开两岁儿子郑讚廷（Asher）有严重残疾，患上全港仅得60位病者的罕见病“天使综合症”。两公婆由坐梳化揽住喊互问“咁点呀？”到选择积极面对，除发起举行慈善演唱会唤起各界关注及了解罕见病，更分享纾解负面情绪心得供同路人参考。
勇敢向前的Step懒理网络上的地狱级凉薄留言，突破经理人阻挡回应：“控制唔到嘅嘢，只能控制自己心态。”採访：方骞平 摄影：罗安强 服装：@suncoohk 场地 : House 1881
两公婆不断揽住喊
Step和郑俊弘分享如何走出黑暗段落的心路历程，至今Fred还历历在目：“去年12月30号去到医务所睇报告，医生未开口经已见到红笔圈住positive，个心即时往下沉，但都要撑住，两公婆紧握双手听医生讲解，唔好将情绪冲昏头脑。直至沉淀过后情绪慢慢走出嚟，我哋係咁揽住喊，嗰段日子真係好黑暗，渐渐觉得于事无补，唔可以俾情绪控制住，係要积极面对问题。”有返笑容的Step谂起都惊：“因为发生喺除夕及新年前夕，Fred仲要去商场唱歌倒数，唔能够哭哭啼啼，可幸同父母交代件事，佢哋反应冇预期中咁差，都少咗份担心。”
谂太远令自己辛苦
对于儿子患罕见病，两公婆曾经历迷茫期，Step希望share方法畀受困扰嘅同路人互相打气：“我哋曾经坐喺梳化互问‘咁点呀？’最后决定用最基本方法开心过每一日，好感恩阿仔虽然有罕见病，但寿命唔会比人短；感恩佢好乐观容易笑，得到简单嘅快乐，最开心係家庭成员个个都爱锡佢，其实开唔开心係自己选择，身边有好多嘢值得感恩，好难预计有特殊需要嘅小朋友，30年后会点，𠵱家属于严重残疾，但可能10年后研发到药物呢？所以由嗰刻开始决定抹走负面情绪。”
Step觉得愁眉苦脸，一直受困扰唔做任何嘢，只会剥削囝囝每日进步嘅权利。“其实谂得太远只会令自己辛苦。”Fred完全同意：“其实阿仔有少少进步经已好开心，早几个月佢学识将隻虾放入口，可能呢啲只係6个月BB嘅举动，但对我哋係天大喜讯，已拍片无限loop，又传去家庭群组庆祝；阿仔少咗抽筋，胃口好好经已係好事。”
考虑再生挑战4个
因为儿子患病，Fred学会活在当下：“见佢做物理治疗时会吃力到爆喊，但两分钟后又会忘记辛苦笑返，呢个BB真係好劲好勇敢，佢启发到我唔好执著过去及担心未来。”Step亦扩阔咗眼界，觉得世界有好多可能性，只要放个心落去，将来有机会成事。除此之外，亦令家人更加团结，珍惜相处时光：“𠵱家我哋改变晒生活习惯，Fred减少咗同朋友嘅消遣时间，收工即返屋企睇住个仔。”
Fred指阿仔每日都会脑抽筋，会短暂晕一晕，要Set时间表安排家人及家佣睇实，若危急时要送入院。虽然有压力，但Step唔排除再生B：“一直觉得家庭至少有2个小朋友，Fred甚至想挑战4个，呢方面唔心急，但再生嘅话顾虑会多咗。”儿子因基因突变确诊“天使综合症”后，郑氏夫妇做过所有基因检查确定冇问题，Step说：“小朋友选择咗我哋家庭係缘份，希望好好利用天意畀到最好嘅嘢佢。”
对于各界对事有不同声音，除力撑外，网络上也有不少口臭网民的地狱级凉薄留言，眼见记者被经理人阻止提问，Step突破防线大方回应：“每个社会都会有唔同嘅声音，冇可能睇法会一致，我哋接受咗係咁，控制唔到嘅嘢，只能控制自己心态，最重要帮到小朋友及罕有病者，争取多啲机会係我最想做嘅嘢。”
