星岛：梁靖琪凑仔唔打扮阿佘睇唔过眼怒扯发夹 后生8年老公常被讚靓仔
梁靖琪（Toby）入行20年受尽负评，终在话题剧《家族荣耀之继承者》演命苦败家千金“Nana”一铺翻身，有网民更以“本人郑重向梁靖琪道歉”为题出po，讚她演技好，加上爸爸兼该剧总监制梁家树畀叻大讚，Toby讲起都眼湿湿。另外，谈到细8年的靓仔老公施隽贤（Jonathan），41岁的Toby承认要keep住状态有压力，更爆笑重演因打扮求其，被好姊妹佘诗曼怒扯髮夹一幕。
採访：杜杜 摄影：Stanley、林宾尼 髮型:Michael lam@Beijing hair culture 化妆:刘柏麟@Stephenmakeup 服装:farfetch 场地:Bela Offices
Toby曾因冇自信驾驭角色而拒演“Nana”，“好惊做得唔好，‘Nana’冇中间位，又破坏佘诗曼同林峯，好大压力。”因为导演一句，“谂唔到边个做得比你更好”，令她决定一试，但又给自己超大压力，特别是情绪失控戏份，“唔只手震，我拍到缺氧，要跑入厕所呕。”
开播时“Nana”不讨好，令她好担心，甚至唔睇留言，“丑係必然，但话差就惊嘞！点解呢？好似返番转头，《蚀日风暴》到《家族1》啲人都话OK喎！睇完留言好大压力，唔想影响情绪，唔开心小朋友会知，到开始有人讚先够胆睇。”
曾想转行放弃做幕前
到“Nana”死前戏份，Toby终得到观众认同，更有观众公开向她道歉，令她觉得辛苦都值得。回想入行不久已受尽负评，Toby坦认不好受，“其实好难顶㗎！但观众闹我啲嘢係啱，例如声调、演技，自己慢慢反省，亦有好多人提点我，捱到20年都好犀利，咁样算唔算EQ高呢？！虽然好唔开心，但睇化咗，今次真係赚咗好多。”因为一直被打击，她想过转行，“最想放弃嗰时开咗婚纱及wedding planning公司，但真係好锺意做戏，咪唔好放弃囉！”
因为长期负评缠身，Toby最心痛影响父母，“尤其我做咗妈妈更加明白，嗰时爸爸妈妈叫我唔做呢行，你估佢哋唔伤心咩？！唔出声啫！”今次有好成绩，Toby最感动得到父亲梁家树认同，更讲到眼湿湿，“嗰个网民道歉Po係爸爸send畀我，佢话‘你睇吓呢个网民讲乜嘢’，然后畀个叻叻我，好开心，呢个世界实有人锺意同唔锺意我，但屋企人认同係好紧要，特别係我太在乎佢哋，爸爸畀叻叻就好开心。”她打算将经历跟两个囝囝分享，“同佢哋讲，好多人可能会批评你，觉得你唔好，但你唔好放弃。”
老公后生成扮靓动力
Toby获讚后，对演戏更有信心，但未敢全情投入，始终分别4岁和2岁的囝囝太细。适逢拍摄《家族》期间老公生日，全家陪她到马来西亚开工顺道庆祝。她认为儿子相伴，有助抽离“Nana”沉重情绪，“一入房係Roman同Rian妈咪，就抽离咗，好多场就算係夜戏，返去闻吓佢哋就好放鬆，舒服晒！”
41岁Toby同33岁老公Jonathan相差8载，两年前她接受本报访问时，正准备生第2胎，当时很担心自己走样，跟老公差距更大，这次见她已回复状态，她笑言多得“Nana”，“佢啲衫好短又薄，有特登减，1星期做足3、4日运动，但係就憔悴咗，出晒眼袋又乾，实在冇完美，希望网民明白。”
她笑指老公年轻亦是她努力keep的动力，“老公呢排好勤力，成日做facial又脱癦，我话‘你唔使嘛老公，你好细个咋噃，我都未整你整’。”
Jonathan经常被网民讚靓仔，她坦认老公比她更贪靓，搞到好姊妹佘诗曼都睇唔过眼，“我真係好求其，我阿妈有时都话我‘你真係唔好着到咁样’，但接送小朋友真係好早，我唔理个头，夹个夹就算。”Toby更模仿阿佘发火扯走髮夹一幕，“佢好忟憎咁话‘你唔好再戴个夹啦’，似唔似呀？我好多表情都学佢，哈哈！”
