星岛：曾国祥承认王敏奕加入TVB有压力：同佢做心理辅导
超强抱负提拔年轻电影人带港剧登串流平台
曾国祥（Derek）成功衝出国际为 Netflix科幻剧《三体》担任联合导演，因为串流平台渗透力强，他认为较电影更能提升知名度，所以未来会多制作本土剧，希望能将港剧带上串流平台，令到香港电影电视人可以多条路发展，非常有抱负。
不过，满肚计划的他冇打算跟老窦曾志伟揸旗的TVB合作。至于老婆接连拍剧都有非常厉害的亲热戏，曾导演完全唔介意，抛下一句，“我都做过演员。”答得好潇洒。採访：杜杜 摄影：朱伟彦 场地:ULURU
Derek开心成为第二届“Eye Catcher Global”（ECG）大使，并担任竞赛评审，“好想帮到年青人讲故事，我都经历过𡃁仔时好想拍片，帮到尽量帮。年青人讲故事个慾望同初衷好紧要，唔好俾太多技术嘅嘢规限，原意最珍贵，入咗行呢样嘢会慢慢磨灭。”由参赛者变评审，他笑言生理变化多于心理，“因为老咗好多。”
年届44的他自问初心不变，“睇到锺意嘅电影、书，仲係有好兴奋感觉，慾望仲喺度，心态冇太大变化。”他还用其他方式帮助年轻电影人，最近就为内地导演的新作配音，“佢想搵个有广东腔嘅人去配段普通话对白，之前喺影展认识，俾佢热诚打动，我冇睇个故事就应承做，我经历过搵人帮手，配音係举手之劳啫！”就算新导演邀合作，一样乐意，“有搵新导演倾新project，个故事双方都有感觉先一齐做。”
Derek出任Netflix科幻剧《三体》其中两集的导演，他认为能衝出国际，代表香港角逐第93届奥斯卡最佳国际影片的《少年的你》帮助最大，“去咗好多影展，又有啲奖，多咗好多国家嘅人觉得呢个导演可以倾吓偈，先有《三体》嘅机会。”
他认为亚洲题材抬头，要好好把握，“呢几年见到好多好成功嘅亚洲题材戏及剧，有呢啲例子，越嚟越多外国公司想做啲好东方或亚洲故事，多咗好多机会，需要亚洲电影人去执行呢啲故仔。”
他认为成长背景，对事业发展有一定帮助，“我觉得自己有少少边缘，喺香港土生土长，11岁移民加拿大就係二等公民，读完书返香港，好多人觉得我係CBC，又有少少边缘，喺香港做电影再到内地工作，又觉得我係香港导演，依家到美国做嘢，哈哈！人哋又觉得你係中国导演，但keep住嗰种边缘化，畀到角度同perspective我去创作。”
制作本土剧吸引外国人睇
Derek最新电影计划是改篇美藉华人女作家的小说，预计今年秋天在美国开拍，对于再次改篇小说，他搞笑解释：“懒囉！由零开发好费时。每次都係咁啱遇到好锺意嘅小说，好想去做。”至于何时看到他的港产作品，他表示开发故事中，“希望做到香港本土故事，但世界各地嘅人都会有兴趣睇。”
不过他放眼并非电影巿场，“希望香港本土剧，去到国际平台，其实唔止我，好多导演、老闆都努力紧，觉得可以做到啲剧，出到出面，又有多条路。”他认同网上平台的渗透力比电影更高，“揿个制睇到，我拍完《三体》，喺香港、台湾或者内地，唔识我嘅人话好锺意个剧，之前拍戏都未试过有人无端端话睇过我部戏。”
提到爸爸曾志伟主理的TVB，亦有网上平台myTV SUPER，他就未想合作，“暂时想同啲国际平台合作，冇谂过同本地电视台合作住。”
两公婆工作上会互畀意见
讲到王敏奕的新朵“最美小三”，Derek认为反映了太太有好成绩，“佢係好好嘅演员，睇到佢有好嘅剧，好嘅角色，无论咩朵都好，都係一个认可，好戥佢开心！”而太太连续在《婚后事》和《家族乐耀之继承者》有大量亲热戏，他完全不介意，“我都做过演员，演员工作有呢啲戏就冇办法。”
至于会否夫妻档合作？“工作同生活唔好沟埋一齐，件事会好複杂，我同佢有共识。佢收到剧本会同我倾，我会畀意见，我嘅剧本佢又会畀意见。”
他承认王敏奕加入TVB后有压力，亦有为她做心理辅导，“一路同佢讲，做好自己本份大家会睇到，实有好多说话，又会话你靠关係，话我靠老窦都讲咗咁多年，客观嘅人见到你努力做好自己嘅嘢，自然会证明到自己，尽量唔好太在意呢啲说话，我对佢好有信心。”
