星岛：伍允龙唔敢直认笋盘：我唔係衰人嚟
凭“王九”弹起旧爱钟嘉欣高调讚好男人
《九龙城寨之围城》成为香港史上第2部衝破1亿票房电影，更有望登顶成为最卖座电影。戏中演大反派“王九”的伍允龙（Philip） ，亦人气急升，特别是谢票时被“不讲武德”观众偷袭后，高EQ回应获劲讚有修养。原来Philip早年宣传电影《恶战》已遇过类似情况，在美国教功夫亦试过有人上门比试，甚至搞到要报警解决。
46岁仍单身的Philip，谈到旧爱锺嘉欣公开力讚笋盘，他却不敢直认只笑谓：“我唔係衰人嚟！”採访：杜杜 摄影：罗安强 髮型:Calvin Yuk 化妆:Cosette Lee 服装:I.T
视郑保瑞导演为偶像的Philip，未知演“王九”有得见已开心，“佢以前拍《狗咬狗》嗰啲都睇晒，接到电话郑保瑞想搵我倾偈已兴奋，唔理佢叫我拍咩做咩，都会𦧲饭应，开咗3次会佢先至畀呢个角色我。”他最记得瑞导决定让他演“王九”后的一番话，“佢同我讲‘你拍咗咁多年戏，伍允龙係边个啲人都知，今次试吓唔同嘅嘢，做咗个造型后，观众未必认得你’，我都好锺意导演咁样去处理角色。”
“王九”的招牌笑声，瑞导早在他试造型时已构思，“佢叫我笑吓，试过要我再多啲，就搵到呢个啱嘅笑嘞！”不过他首日开工，仍未捉稳“王九”演法，直到第2日拍跟洪金宝去杀人戏，“嗰场戏cut咗，讲我好兴奋去拣啲武器去杀人，个笑容加强咗，好似去玩咁，见啲工作人员开始模仿个笑容同啲小动作，导演又好似几锺意，就知呢个方向係啱，真真正正搵到‘王九’呢个角色。”
上门砌磋要报警解决
提到早前谢票时被“不讲武德”观众偷袭，Philip坦承以往去外地宣传时，都遇过类似场面，“我同安志杰演嘅电影《恶战》，外地谢票有个情况好似，有个观众举手想同我砌磋，司仪畀佢上台，有少少交流后，佢突然踢咗我一脚，跟住我话‘好痛呀！承让承让！’，咁就解决咗个问题囉！”
他认为做动作演员难免遇到这种“挑机”情况，要好小心处理，“淨係一个方法可以解决，就係保持冷静，同埋判断个情况需要做啲乜嘢。”Philip在父亲伍绍华美国开设的“伍家国术会”任教时，经常遇到有人上门砌磋，“唔可以话踢馆，係啲人好奇啲功夫係咪work，通常有咁情况都会派我出去。”但他强调只会点到即止，“去到个阶段大家明白嗰个功夫就会停，了解咗我哋教嘅功夫係有效。”但试过父亲未开武馆，在其他武馆任教时要报警解决，“有啲俄罗斯嘅武术家，都高大，嚟想尝试吓我哋啲功夫，郁多咗有啲混乱，结果咪要报警囉！”
恨拍拖搵对象讲缘份
46岁仍单身的Philip，一班《城寨》拍档早前更为他公开招亲，他坦承恨拍拖，“都想搵返个女朋友，甚至搵返个老婆，不过呢啲嘢可遇不可求，搵一个适合自己嘅人，自己又适合佢嘅人，互相适合都係要靠巧合。”提到择偶条件，他直言：“最好就靓啦！”
但重要都是缘份同感觉，“最紧要个女仔有爱心，锡我，大家了解同埋明白对方情况咁先可以夹到，所以要时间认识，不过要遇到先可以认识。以往拍拖同埋认识嘅女仔，都唔同类型，係感觉问题，有时要求某啲条件，但遇到个冇嗰啲条件。”
谈到旧爱锺嘉欣以往少有提起他，最近出席公开活动却忽然高调讚他，他大方话：“之前我哋有个历史啲观众都知，咁啱佢出嚟做活动问係正常，我都好感激佢，好开心佢觉得套戏咁好睇，佢话觉得我做得OK係开心，始终都係朋友，任何朋友讚我都开心。”对于获锺嘉欣力证是笋盘，他笑言：“呢啲係人哋讲，我唔敢话自己係唔係，我唔係衰人嚟！”
