星岛：39岁林德信爆老窦林子祥陈年温馨凑仔史
要求带埋结他入产房唱住歌陪老婆生B
去年11月，39岁林德信（Alex）与拍拖5年多的圈外女友Candace结婚，囡囡林明于3月出世。呢位新手爸爸自夸凑女有一手，讲囡囡更讲到唔停口，笑言一直有自弹自唱畀个女听至出世一刻，他更梦想囡囡长大后可以跟老窦林子祥三代同堂齐jam歌。
採访：杜杜 摄影：谭志光 髮型:Henry Ho@Misalon 化妆:Kikoko 服饰:HOMME PLISSE ISSEY MIYAKE(Alex)、ISSEY MIYAKW(嘉嘉)、 Emporio Armani、Fossil、Watch Station 场地:Artisan Studio
Alex最近跟郑嘉嘉合唱新歌《Drifting in Hyperspace(超空间) 》，合作源于曾在活动中邀请嘉嘉做乐手，后者主动将他的旧歌《爱的理由》改编，“因为太锺意出咗先，《Hyperspace》就係觉得嗰次攞个平衡几好，攞啲pop嘅歌加强个底，电子啲跳舞啲。”作为音乐人，嘉嘉谓当日忍不住要主动改歌，“嗰个场合，如果唱啲pop rock嘅嘢会好奇怪，全部玩电子，我咪同佢讲不如改编你首歌啦！”
自弹自唱畀囡囡听
作为新手爸爸，Alex坦认最难是帮囡囡冲凉，其他就难佢唔到，“我试过1、2次，要冲多啲唔熟手，论论尽尽咁。”至于换片、喂奶、扫风？自称喂奶喂到颈都歪的他称OK，更得戚畀个like自己。Alex希望囡囡跟他一样热爱音乐，因有感音乐对他影响好大，“好细个锺意音乐，去到大学发觉识写歌，对我嘅成长同自信心係好大影响，未写歌前个人好迷失，冇乜方向感，写歌后畀到我自信心。”
Alex为令囡囡爱上音乐，早在太太Candace陀BB时已不停自弹自唱，“我有个好mini嘅木结他，夜晚瞓唔着就弹，来来去去都係嗰啲中英文歌，自己歌都有，会弹《Magic》，仲有写畀公公婆婆嘅歌，同埋新歌《爱到发烧》。”
为令囡囡出生时便接触到音乐，他更向接生医生提出特别要求，“畀我弹结他同唱歌畀佢听，我每次弹结他唱歌，陀住BB嘅太太话觉得baby好安静，我哋有个谂法，佢第1吓接触嗰个声係我弹嘅歌，唔知呢个记忆对佢将来会唔会有影响？！”
囡囡一听歌就唔喊
囡囡得3个几月大，Alex已觉得她对音乐有反应，“有次我整紧《爱到发烧》嘅mix，baby喊紧，佢听到即刻唔喊囉！”而他最爱自弹自唱𠱁囡囡瞓，“发觉越简单越好，喺度试紧催眠嘅歌，通常用一句係咁重複。”讲到父亲节时，他将囡囡放在结他上弹奏，他笑言是抄网片，“睇ig啲片见到有人咁做，BB会听到成个结他嘅震动，估唔到一摆佢落去佢就好定，即刻好似好舒服咁。”
虽然囡囡仲细，他已计划将来安排囡囡学弹琴，跟爸爸林子祥当年一样，“佢有要我哋跟老师学弹琴，去到好大个，我第1次同佢讲我有写自己歌，佢叫我弹畀佢听吓，我弹咗啲歌佢觉得好得意，又会分享吓佢嗰排写咗啲咩歌，係好开心。”
嘉嘉好认同Alex做法，因她5岁囡囡锺亦淇（Dunia），亦在她培养下爱上音乐，更会跟她去演出。Alex补充，“佢企喺我哋前面好high，好enjoy！”嘉嘉认为小朋友有音乐陪伴成长会开心好多，所以已安排囡囡学琴，因钢琴在乐理上最易掌握，对学其他乐器亦有帮助。
