星岛：61岁钱小豪激瘦40磅颈筋暴现传恶疾缠身
亲揭身体状况：肠有瘜肉冇晒胃口
61岁武打演员钱小豪月前流出跟内地影迷唱K聚会片段，因为身形暴瘦，惹来生cancer及患上严重糖尿恶疾揣测，瘦到头大身细的小豪哥接受《头条日报》独家访问，拆解罹患重病传闻。小豪哥对被臭口网民直指患重病完全冇激气，“啲网民为刷存在感乱咁噏，我又有型又几man呀！有少少皱纹好正常。”
他坦言目前食得清淡外，连色都戒埋，“(同太太丘倩鸣)冇性生活好耐啦！”採访：方骞平 摄影：朱伟彦 场地：封神文化
钱小豪曾演过《大头绿衣斗殭尸》、《殭尸先生》等作品红极一时，近年主力在内地拍网上电影，吸纳到新一批fans，不时在社交网互动，甚至搞fan club聚会。早前流出小豪哥的影迷见面会片段，暴瘦苍老状态吓亲唔少人，大量网民留言作出关心，甚至直指他身体有问题。
中两次Covid致暴瘦
为怕病重揣测越传越失控，钱小豪接受《头条日报》访问亲述最新健康状况。访问当天气温高达30几度，小豪哥仍穿长袖衫现身，但仍遮掩不到瘦削身躯，加上头大身细，颈筋暴现，状态的确令人担心。身高5呎7吋的小豪哥坦言目前体重唔够140磅，较最高峰时跌咗40磅，加上腰患复发，当日行路似足机械人，令人心痛。
小豪哥表现无奈，自言搞成咁要从疫情开始讲起：“中过两次COVID-19，去上海拍戏要入住隔离酒店，第一次被隔离乜都唔知，原来与世隔絶，唔可以送餐入嚟，我朝朝食好难食嘅冻馒头及鸡蛋，20几日后胃口收细，到𠵱家仍然冇乜胃口食嘢，每日只係食晚餐，食几嚿肉就食唔落，平日食得检点唔会食煎炸嘢，都係饮汤食汤渣为主，唯一最爱食云吞麵，但只係贵精不贵多，食碗‘细蓉’就够，我都想搵增肥方法。”
曾做大检肠有瘜肉
提到健康状况，小豪哥表示算ok，小毛病实有：“‘3高’中，胆固醇高咗少少；血压由50岁开始偏高要食药，但成日唔记得食；血糖正常，我一直冇糖尿病，更加唔係传闻中糖尿病失控，传闻吓到我阿妈打电话嚟话‘见你有病，有乜煲畀你饮好？’”
他强调60岁前为咗买医疗保险曾做过大检，报告显示大肠有两粒瘜肉、胃有幽门螺旋菌、肺有少少花及轻微青光眼。月前再做肝胆胰、肾、心脏、甲状腺检查，全部正常，估计被误会生癌因为剃头累事：“几个月前髮型师发觉我头皮有两挞唔寻常嘅黑斑，要剃光头抽组织化验，结果虚惊一场。大家见我瘦咗咁多，又剃光头惹疑云。唉！𠵱家啲网民为刷存在感乱咁噏，由得佢哋无聊啦，冇乜好激气，我仍有型又几man呀！有少少皱纹好正常，够自然，又唔係咩老态，啲人评论瘦又话瘦；肥就话唔长进做终极大叔，所以唔理得咁多，做人最紧要开心，瘦咗轻鬆啲。”
老夫老妻已分房瞓
小豪哥由16岁开始拍戏到60岁，最难忘首部亚视剧《霍东阁》：“一日打10几场戏打到个人变空壳，试过晕低入院半日。”另外，1988年他跟万梓良及陈玉莲拍电影《陷阱边缘》，其中一场被人踢落楼梯戏失手，他后脑著地，左边手脚失去知觉后昏迷送院，几日后甦醒却“断片”：“当时仲唔识惊，因为孭住几组戏，醒返仲谂究竟拍边场医院戏？”他仍热爱拍电影，不过现阶段有少少“资源”养妻活儿，而唔打算再拍剧集：“唔係健康问题，但咁辛苦为乜？留港陪吓屋企人好过。”
另外，有报道指他10年冇跟老婆“行埋”？小豪哥大笑道：“我讲笑啫，但真係好耐，老夫老妻多年嚟分房瞓(係咪有心无力？)唔知呀，因为太耐冇用！自从孻仔出世，将所有精神放晒佢度，我又唔敢去内地夜总会，听过一个男艺人爆笑咁讲，经理同佢讲‘呢度好安全唔使惊，好似xx男星嚟过都冇爆出去喎！’哈…黐线㗎！所以做艺人要好检点，喺facebook撩吓女仔咪满足囉。”
