星岛：张驰豪拍剧拍出瘾有信心做男一 兴奋着制服演PTU最难用手扣锁人
张驰豪（Aska）在 《反黑英雄》饰演PTU明日之星“李耀政”，首着制服演纪律部队，令他好兴奋。更因为爱上演戏，想挑战不同角色，反派或卧底就最想演，甚至有信心挑战主角孭重飞，好有大志。
採访：杜杜 摄影：罗安强 髮型:Hugo Poon@PRIVATE i salon 场地:The AIR (The ONE)
Aska 有个“制服梦”，所以演到“李耀政”相当兴奋，“PTU係其中一套觉得有型嘅制服，有机会着更加开心啦！”事前监制方浤酌要求他晒黑配合角色，但他嫌未够，“我都有增磅操大隻啲，希望着起套制服会更加好睇。”
多得陈山聪张頴康提点
首次扮演纪律部队，Aska觉得有想像不到的难处，“着制服有好多规矩，就算用手扣锁人好似好简单，但原来都唔易，个动作总係唔顺，多得陈山聪和张頴康提点我。”他又开心跟“部队”建立感情，“我哋真係好似一team人咁开工，我同角色一样係队中新丁，大家都好照顾我。”
演戏多令他越加喜欢，因跟唱歌很不同，亦可以互相影响，“唱歌要学习投入情绪，演戏就可以学到点样控制情绪，对投入同表达都有帮助。”未来他希望唱歌和演戏双线发展，“唱歌除表演外，制作过程较易迁就，唔会影响到拍剧，反而我会利用拍剧空档写歌𠻹！”
除了警察，Aska亦想演消防员及海关，“医生都唔错，着起制服个感觉真係好唔同，我唔怕辛苦。”讲到最想挑战角色，即谂起《反黑》的袁伟豪和张振朗等角色，“拍咗几个剧都做啲正直角色，好想演吓袁伟豪嗰啲大奸角，或者张振朗嗰啲卧底，应该有好大分别，好好玩。”
若然有机会演男一，他亦有信心担此重任，“之前真係冇乜信心，觉得自己讲广东话好差，𠵱家大家都话我进步咗，同埋之前出到跳舞歌，证明有啲嘢要逼出嚟，所以有更加重嘅角色，甚至係主角，我有信心挑战。”
