黑历史提醒自己进步 张天赋唱歌最大筹码係？│封面故事
公认为新一代乐坛“实偶派”的MC张天赋，他自评外貌有七分、唱功有八分，最强优势是nothing to lose，冇嘢输！
入行短短四年，MC的音乐在市场佔据率很高，由《反对无效》、《小心地滑》到《世一》，首首都有话题性。当歌手们都呻，在香港唱歌搵唔到食，二十七岁的MC已经赚到第一桶金，让妈咪可以提早退休，亦兑现了签约唱片公司时的承诺。
唱《世一》等唔等于享受做“世一”？MC深明“世一”背负好多，包括责任、压力和情绪，只希望保持初入行“张三岁”的孩子气性格，MC话︰“如果有得拣，做世二都好呀！”
拥有一把识别度高的声音，MC出道四年，靠这把声由街头唱到红馆，刚推出的新歌《百万大道》更首次参与作曲，“当日签约时，公司有俾压力我，佢哋话公司（华纳）好多都係唱作歌手，你都要向呢个方向行，我话咁要写几多首呀？公司话预写一百首有两、三首中啦，呢首歌当俾自己一个功课。我用伴奏网页试玩，一揿入去听到第一个伴奏，唔理係咩类型都好，我都照写，写咗demo，胆粗粗send俾公司，又竟然用咗。”《百万大道》内容讲青春、讲赌博，MC说正是他的心态：“Nothing to lose，当冇咗输嘅心，咩都敢去赌！”
唱歌技巧无师自通
问MC，最大的筹码是否把声？他说︰“我觉得係对唱歌份热诚，坦白讲，把声绝对会随住时间，同年纪一路去磨损和消耗，但係唱歌热诚可以一直保持，就算把声伤咗或者冇咁好、冇以前咁靓，依然有个心，会有另一个方法去唱、另一个表达方式，我觉得呢个反而比起声音更加紧要。”
MC的唱歌技巧是无师自通，他说当然有用错声的时候，“由我busking到参加比赛，甚至出咗道，好多时候都会有用错声经验，我并唔係好正规跟老师学过唱歌，只是自己去鑽研一个比较正确唱歌方法，所以好多时行多咗好多冤枉路。我觉得作为一个现代流行歌手，要搵一个平衡非常之难，因为你唱得啱又未必一定好听，唱得好听呢，又未必一定最保护到声音，所以要搵到一个平衡点。”
曾经有中学生以《记忆棉》参加比赛，片段在网上疯传，MC不惜自揭黑历史，发放一段青涩自拍短片，全情投入唱出周杰伦的《双截棍》， MC说︰“感情和技巧，我一定注重感情，《双截棍》虽然算黑历史，但呢个係提醒我自己，人会进步，只要你肯花时间、肯练习就会有成果，到呢一刻，我都仲记得当时自拍完的心情，我好自豪觉得唱得好好听，再去揿熄个录影掣，跟住就要即刻po上网，当时我係自信心爆棚，依家回顾返，成条片只得自信喺入面。”
问MC哪个演出最深刻？他先叹一口气，再说出小秘密，“第一个当然係红馆，但这个深刻原因，因为我人生中未试过，喺台上咁唔享受，真係非常之大压力，当时换紧衫quick change时，我心入面同自己讲‘不如唔好做啦，返屋企瞓觉啦’，当然心底里知道冇得走，真係有一把声音叫自己逃避，我觉得係一个保护自己嘅感觉，我好少喺台上面係唔享受，紧张还紧张，但去到你唔能够去享受呢个舞台，我觉得就係一样好严重嘅事，我都搵唔到一个形容词，总之好担心、好紧张、好抑压。”
当时唱片公司没有因为《This is MC演唱会》的成功，马上宣布开巡迴，到了今年才开始把演唱会带到其他地方，如广州与马来西亚等地，让MC“慢慢来”，他说：“去到第二站，先慢慢放鬆，毕竟第一次红馆，太多嘢需要去记，亦係自己一个突破，有咗第一次经验之后，慢慢就开始享受。”
第二个深刻的舞台经历，MC表示是小学二年级的歌唱比赛，“哗，呢个都好深刻，当时小学二年级，报咗社区歌唱比赛，我记得其他参赛者都比我大，已经中学，因为当时比赛冠军奖品，可以有一年免费唱K，我觉得好正喎，于是胆粗粗报咗，即使好淆底，都硬住头皮上台，当时唱方大同《Love Song》。”
成为家中经济支柱
相信当时的MC，也想不到自己日后，真的可以靠唱歌“搵食”，二十七岁仔，入行短短四年，MC已赚到人生第一桶金，他笑言：“咁又好视乎第一桶金係几多嘅？可以咁讲，应该话去到一个自己都估唔到嘅数目啦，可能二十岁嘅自己都估唔到，七年后自己会搵到呢个数目，其实都开心和惊喜。当初签约，我同经理人讲，我话希望可以养到妈咪、养到屋企，我唔怕辛苦，咩都帮我接啦！妈咪两、三年前都冇做嘢，正式退休了。”成为家中经济支柱的MC，人也变得踏实，“终于知道，细个唔会明白大人，冇钱咪去银行揿囉，大个当然知道原来唔係咁简单，要孭起头家，唔係淨係搵钱，好多嘢同时要承受，同埋好多嘢要识得计算，但我觉得我个人踏实咗！”问到此刻的目标，MC坦言希望三十五岁前可以退休，“我仲有七、八年时间，咁又好视乎要啲咩退休生活嘅？”
