钟嘉欣广州开个唱好姊妹拉队撑场
Linda重演婚礼扔花球：分享番呢个重要时刻
《Remember‘记得’・锺嘉欣演唱会2024广州站》昨晚（8月10日）假广州中山纪念堂举行，锺嘉欣（Linda）相隔10年再开个唱，反应热爆，全场座无虚席。
而当年被外间封为“处女党”的Linda好姊妹岑丽香、李亚男、苟芸慧、王君馨拉队到场支持，此外黎诺懿与太太李洁莹亦有捧场。
Linda以经典金曲《一颗不变的心》为演唱会揭开序幕，期间更以劲歌热舞上阵，掀起全场炽热气氛，不过最叫观众惊喜，莫过于Linda献唱《我结婚了》，她还向观众扔花球，分享人生重要的一刻。
为完成今次个唱，Linda连月来努力练歌排舞，重拾颠峰状态，最终亦不负所望，她在演唱会一共演绎21首歌曲，当中包括为人熟悉的《其实我不快乐》、《一人晚餐》、《日夜想你》、《最幸福的事》等，最令Linda感到挑战，绝对是以热舞跳唱演绎《Love Love Love》、《得閒找你》及《梦伴》等。
她说：“今次演唱会係花咗好多心思，一步一步计划出嚟，最大挑战係跳唱环节，始终好多年冇跳舞，所以我跳出舒适圈好努力咁练习，好开心最后可以好顺利完成，希望自己可以继续做到老学到老，继续挑战新事物。”
家人视像解思念
提到演唱会最难忘一幕，Linda不讳言是献唱《我结婚了》并向观众扔花球：“唱呢首歌，之后扔花球畀观众，其实2015年突然结婚嘅消息，当时刺激咗好多锡我嘅人同粉丝，之后我再突然离开香港生活、生仔，好多粉丝都冇见证到我嘅婚礼，呢个环节好似之前结婚咁，分享番呢个重要时刻，而花球裡係好特别，有我写嘅字句。”
Linda续说：“其实成个演唱会，有好多令我感动嘅时刻，喺出骚前，我有个目的，就係上天透过我嘅正能量，将爱同关怀带畀观众，好感动我喺今次演唱会成功做到。”
对于一班好姊妹与好友专诚到广州撑场，Linda大感惊喜，她说：“唔知道佢哋会嚟，之前君馨又话要开会、亚男又话要返工，个个都好似好忙咁，佢哋突然间出现晒，好惊喜。”
完骚狂擦煎炸嘢
另外，问到屋企人可有到场？Linda指：“今次家人冇嚟，因为太长途，佢哋都觉得有啲可惜，希望将来佢哋可以睇到一次我嘅演唱会，我同囡囡讲‘唔紧要，妈妈会继续加油，下次睇我演唱会，演出会更加劲嘅’，而我老公，佢一定急不及待完骚后喺网上搵片嚟睇。”
Linda又笑言，完骚后要食好多煎炸热气食物：“我要食好多热气、好辣、好炸嘅嘢，因为呢排要好好养声练气，饮食上都好节制，完骚当然要食餐劲，同埋想第一时间返加拿大见我老公同啲小朋友，好挂住佢哋，我哋日日都有视像，有时短暂嘅分离，会令大家关係更加思念。”
