星岛：直击秦煌护老院生活双脚肿晒仍好胃口 内地女友唔愿畀钱来港探望被逼分开
76岁行动不便的秦煌独居无依，今年3月在青衣酒店房跌倒送院，之后安排入住护老院。秦煌形容在护老院的3个月生活因祸得福，事关获社福机构每月给予$11,000住院生活津贴，另有$4,000综援，三餐不愁，唔使急于抱病开工“扑水”，坦言安乐哂。《星岛头条》记者于晚饭时段探望煌哥，虽然双脚肿晒，但胃口唔错，扫清时菜肉片饭，但本来笑笑口的他，讲起久未见面的内地情人Mary即一脸无奈：“过去式喇。”採访：方骞平 摄影：谭志光
近300磅的秦煌送院后发现有贫血、营养不良，而且多处机能循环唔好导致双脚浮肿，目前每周被安排去医院做物理治疗。另外，12年前在剧集《法网狙击》跟他结缘的陈炜，亦慷慨出钱安排按摩师每周上门。
双脚肿如“裹蒸糉”
煌哥要全天候着尿片，隔日会有职员帮他冲凉，由于要方便坐轮椅的院友上落床，所以住在只得布帘分隔的大房，不过每朝起身后，他会被推往所属的私人空间开饭及睇电视。煌哥称已习惯老人院生活，对于院舍膳食质素及照顾安排，亦好满意。
《头条日报》记者探望煌哥当日正值晚饭时间，他扫清时菜肉片饭，食得津津有味并满足地说：“入院初期戒饭，故落咗60磅，肚腩都细埋，𠵱家唔敢太瘦会食返一碗细饭，有返饭气面色都好啲。”
不过，他称就算瘦咗都要着10XL裤头。讲到身体状况，煌哥形容都ok：“右脚好有力，左脚就差咗少少，可以扶住企起身再扶住行两步，但我好惊，冇乜信心行得耐。”记者见到著咗鞋的煌哥，双脚肿到似“裹蒸糭”，右边小腿又包咗纱布，他解释是久久未癒的小伤口：“职员好紧张，会帮我包好伤口。”
欠60万咭数预破产
说到经济状况，煌哥获社福机构每月给予$11000住院生活津贴，另有$4000综援，每月“出粮”日子就最兴奋，会叫朋友推他落街揿钱及买零食：“呢度5点晚饭，要买定杯麵做宵夜。”煌哥坦言得到社会保障，总算唔愁生活：“以前我唔识㗎，係跌倒后社工帮我申请，所以𠵱家唔急于返出嚟做嘢，如果啲老友唔介意我坐住轮椅去开工，只能行得嗰两步，咁我都唔介意畀人睇下我个样，唔好唔记得我。”他透露跟《爱回家之开心速递》剧组好老友，“佢哋曾提出如果我状态好又行得，叫我去玩下。”
提到帮已失去联络的大女还债，搞到要套现3层楼及耗尽300万现金，煌哥后悔至今，“因为冇问原因，还累到自己签落60万咭数做生活费。”周身债无力偿还，他亦有破产的心理准备：“银行有追我数㗎，但追追下都唔追，追到攰冇心机啦！我都还唔起…不过，我都70几岁唔介意破产，反正有食有住仲有零用钱，如果银行强制我破产仲可以悭返万几蚊律师费。”一无所有的煌哥唔觉得失败：“唔係失败，只不过经历过沙士、疫情等，係环境所造成，再加上被亲人拖累。哈！係命运问题。”
唔想Mary嘥钱探佢
目前煌哥最唔放心就係跟咗佢20几年，较他年轻30岁的内地情人Mary：“叫佢落嚟探我，包佢食住要畀成皮嘢，佢唔捨得畀，我又唔想佢畀…”煌哥有感而发：“已经係过去嘅事，我要照顾自己先，(同Mary已成过去式？)可以咁讲，但我冇怪佢，係我冇搵佢。”
他指当年20岁的Mary帮他煮饭做家务，觉得做完就係佢嘅人：“直至佢36岁，话‘女人责任一定要生一个’，当时係我话唔可以同佢生，建议佢搵人生，生完由我养，两母女搬返嚟深圳同我一齐住。”
煌哥直言唔介意Mary跟他之后，还跟其他男人有性关係：“咁佢返嚟后同我一齐住都冇走过，从一而终，如果Mary因为想生仔，我唔肯配合要求分手，我谂做人唔应该咁。”煌哥早年已送咗湖南楼畀Mary两母女，目前女方有车有楼，煌哥答得黯然，“久不久会谂起，但俱往矣。”
