孟希璘冇工开搵钱少亏欠父母：屋租水电媒出街食饭阿妈俾晒 | 香港01
孟希璘今日（29/11）现身天水围出席TVB热播剧集《异度感应》宣传造势活动。提到绿业王戴耀明被揭冇剧拍，为生活到“饮食界富二代”张本立（Billy哥）黄大仙的茶餐厅洗碗倒垃圾，令网民感到意外。
孟希璘接受《香港01》访问时表示：“其实做我哋呢行，就真係唔係日日有工开，变咗好多时候都要谂定其他嘢做去帮补收入，我谂过揸电单车送外卖，但考咗4次唔合格，点解我想电单车送外卖，係因为贪佢够弹性，到我有剧拍嘅时候，我随时唔返都得。假如我返茶餐厅嘅话，应承咗返工就唔可以甩底，变咗就冇咁弹性，始终自己就唔钟意甩底嘅人嚟。”
孟希璘入行6年时间，明白到演艺圈多竞争，演员路并不易行，她感激父母一直支持同体谅，令她可继续追梦：“其实收入唔多嘅时候，就会悭住用，屋企嘅水电、媒同屋租，全部都係靠屋企人，就算出亲街食饭，全部都係我阿妈俾晒。其实我个心係好不堪，觉得对佢哋唔住，对佢哋好多亏欠。好多谢佢哋一直咁支持我，佢哋好理解我对呢行仲有份使命，而佢哋觉得我如果离开呢行係会觉得好可惜，而我爸爸佢虽然六十几岁，但佢仲觉得自己仲有啲活力仲撑得住，变咗佢哋唔想我放弃呢样嘢。”
