星岛：马海伦专访︱抗拒亲热戏宁做打女！
忆与郭峰同床：都唔知几安乐 产后被程小东闹爆“好X慢”
《爱．回家》饰演清洁工“苏姐”的马海伦（Helen），一直被外界报细数指她只得73、74岁，她接受《星岛娱乐》访问，自揭生于1948年，属老鼠，她入行60年，抗拒拍亲热戏，宁选择做打女，惟动作打女的路也不易行，她曾试过堕马身体受伤甩骹，生产细女儿何敏晴后接拍《鹿鼎记2神龙教》时又遭武指程小东爆粗责骂。曾经好执着的马海伦经历误诊患乳癌后，有感生命得到“重生”，从此一改固执的性格，凡事看开，好好活在当下。
马海伦入行60年不愿跟男对手拍亲热戏
马海伦曾是邵氏花旦，入行60年演过不少角色，在TVB的36年裡曾两度提名“最佳女配角”。2013年，她获TVB颁发“杰出演员大奖”演艺事业得到肯定，但遗憾未能如愿夺“女配角”奖项。马海伦在演艺事业上守身如玉，她宁做打女也不想拍谈情说爱的亲密感情戏，“邵氏嗰时成日去练打、骑马，唔想有感情事，嗰时好少kiss，揽揽锡锡我又惊喎！拍打就好少机会咁！”
马海伦堕马走过鬼门关
马海伦年青拍戏时主打拍动作片，她曾经在城门水塘拍骑马戏时堕马撞甩骹，更险被马匹踩中，在鬼门关走过，她忆述当时的危险情况至今仍犹有馀悸，“隻马失蹄踩到啲石头跪咗落去，我被抛落地，膊头撞咗落地下手臂甩骹，隻马喺我上面跨过，差啲俾隻马踩死，丁佩姑妈係跌打师傅，佢扶我出去，冇止痛药、冇止痛针打，夹硬托上去，成个九龙城寨都听到我嗌，痛到眼泪狂流！”
马海伦为免妈妈担心，回家时也不敢向妈妈透露半句堕马，只轻轻说：“撞亲啫！”她躺在床上不停流眼泪，食止痛药也没效，一百日不可以拿东西，甚至她报名打保龄球都不能打，“而家嚿骨凸咗出嚟！好彩冇旧患，开头郁返打都惊甩出嚟，但呢嚿骨发胀咗之后，就缩唔返。”马海伦没有因此吓怕骑马，照样继续骑。
马海伦被程小东爆粗闹
马海伦在《鹿鼎记2神龙教》中饰演独臂神尼，狂野演出十分亮眼，“《鹿鼎记》程小东做武术指导，我喺丽的拍过《天蚕变》，程小东仲以为我係嗰个年代仲打得，打到呕电，仲要一隻手喎！一隻手好冇平衡力，嗰时仲畀佢话：‘马海伦，点解你咁X慢呀？’我好嬲话：小东，你日日喺度操，日日喺度练，我几耐冇打呀！你睇吓我几多岁！佢第一个镜头就吊威也倒拍，我要追威也，威也一扯就去，我点追呢，跟住佢话：‘你好X慢！’嗰阵时我啱啱生完个女……”
马海伦因误诊患乳癌改变人生观
马海伦在2003年一次妇检中，被医生检查到乳房有“一粒嘢”，更误以为是生乳癌，此事令她对人生观改变了不少，“曾志伟好好，帮我搵宝妈（曾宝儿妈妈）喺台湾帮我book医院，全身检查，香港就每一part check，台湾有部机全身check晒，我check咗之后都话有机会，主诊医生唔喺度，另一个医生话有机会係，叫我快啲抽个细胞化验。”
马海伦得悉结果放下心头大石
当时，马海伦很担心年老的妈妈，加上大儿子何存广准备结婚，如果她要做化疗，头髮甩晒怎算？最后马海伦获丈夫的医生哥哥帮忙，找到香港乳癌权威的张医生替她作进一步检查，“台湾啲片攞晒过嚟，张医生一睇话，‘机会唔似係’，但係百分百稳阵，我帮你攞粒细胞出嚟切片化验，我就入咗养和，朝早入下午三点几出院。做完之后，佢好细声同我讲：‘恭喜你，唔係嚟，係脂肪瘤’我喺养和出嚟时，抖咗啖气，好似压喺心头大石突然间爆开咁，人生好似去到另一个阶段，重生咁！”
任何事都不应计较太多
马海伦指这次经历令她对任何事都不在乎，“以前都会有啲嘅，做嘢人哋咁样，有人曳我会喑噚，而家我唔会，算啦！我唔讲有人都会讲，佢自己执生囉！睇得好开，唔好计较咁多，唔熟剧本，入到嚟𦧲𦧲𦧲大家要等，唔係好锺意，除非好离谱睇唔过眼，我都会讲吓！”
