明报：陶大宇亲揭嗌“车匙”冇次嗌得准：连郭可盈都冇纠正过我
由阮兆祥、梅小惠和江欣燕主持的《友乜唔讲得》，昨晚（30日）嘉宾是有“师奶杀手”之称的陶大宇。
要数陶大宇经典剧集作品，不能不提《刑事侦缉档案》，当中流传至今的话题，是大宇在剧中将郭可盈角色英文名Jessie读错做“车匙”。对此，大宇指是“纯粹真係讲错”，并笑言若大家细心留意，会发现他不但将Jessie读车匙，还会读错做“Jack匙”、“姐匙”等，但令他最感离奇的是，从来没有人纠正他：“如果大家抽丝剥茧，我嗌郭可盈个英文名，係嗌咗3至4个唔同音㗎，但都冇人纠正过我，就连郭可盈都冇纠正过我，总之係（读到）错晒，冇一次嗌得准嘅，原来咁都得㗎喎。”
谈到可盈，大宇直认对方很夹，并谓可盈选完港姐第一部电视剧，就是和他合作《Catwalk俏佳人》，问到当时有否以前辈身分教郭可盈，大宇说：“唔使教，可盈好聪明，好快上手。”又大讚当时公司甚懂宣传之道：“当时喺电视剧入面都算创先河，因为嗰时係一班港姐演，有啲有名次、有啲係落选嘅，为咗令人熟悉佢哋，剧入面全部用佢哋真名。”
谈到经典作品《刑事》，大宇坦言苦多于乐，并以“一片空白”形容拍后感：“拍得太多呀，同埋咩都关你事，变咗无咗感觉。你知电视剧跳拍嘛，一辑入边可能有8单case，但你唔係逐单case拍，係一日拍2、3单case，所以係乱晒大笼。”
大宇又分享发忟憎经历：“3句对白㗎啫！我好记得嘅，我只係做一个镜头，就係‘咯咯咯’（敲门声），林漪娸Madam话come in，我就入去话:‘Madam，成件事close file㗎喇，我哋可以唔使再查落去㗎喇’。就係咁简单啫，我係冇办法一个shot讲到，攰呀！我连madam都讲唔到，终于嗰句对白要分开3个shot拍。”
大宇续说：“嗰时喺4个月里面，我同忠仔（梁荣忠）差唔多每一日只係平均瞓咗3粒钟，但都开心嘅，大家一齐捱，见个对手仲多过见自己阿妈。”
谈到家人，被3位主持盛讚孝顺的大宇，18岁已要面对父亲离世的境况，而他坦言十分感恩妈咪“零压力”教育方法：“我锺意佢（妈咪）对我由细到大嘅态度，由我读书、入行到𠵱家，甚至乎我自身嘅嘢，佢从来冇多过口，冇畀压力我哋，呢样好紧要，唔使返到屋企仲听到咁咁咁、乜乜乜，好舒服。”
祥仔闻言，亦分享了亡父的贴心往事：“我爸爸将我参加新秀嘅小剪报贴咗喺佢locker后面，原本我唔知，係有日爸爸走咗后我撞到佢同事，佢嘅同事先同我提番呢件事。”欣欣亦附和：“佢哋都係以我哋为荣，就算我哋好红、抑或唔红，佢哋都当我哋係宝。” 
