明报：爱·回家｜姚焯菲怀旧学生造型抢镜 刘丹忆1963年制水苦况
TVB处境剧《爱·回家之开心速递》昨晚（29日）播出《给我一口水》，讲述熊家所住大厦因爆食水喉暂停供水，众人只好到街喉取水。为了突显食水得来不易，剧情重现香港1963年4日供水一次、每次供水4小时的情况。
“回到1963”的吕慧仪、滕丽名、姚焯菲（Chantel）、古佩玲、庄思明等各出奇谋争水，吕慧仪的孭仔师奶Look、滕丽名的马姐Look、姚焯菲的旗袍学生Look均十分抢镜，加上众人的“怀旧演技”，为故事增加不少喜感。
Chantel年纪小小，未经历过制水苦况。她接受TVB.COM访问时表示父母多年前已教她要珍惜食水，不可随便浪费。Chantel说︰“无论我冲凉或者洗手都唔会开大个水喉，呢个世界有好多人需要用水。”
经历过1963年旱灾的刘丹及罗乐林谈到这段往事时异口同声表示要“珍惜食水”，刘丹透露当时每家每户都会放置两个大桶装水，当时住得较高的街坊取水亦相对困难。他说︰“我当时住嘅楼层唔高，水嘅源头就猛啲，所以一有水嗰日，一开水喉好快就可以装满水。不过，住唐楼嘅街坊，因为大家一齐开水，啲水会唔够力，令到住楼上嘅水压升唔到上去， 所以好多时就会大叫‘楼下闩水喉’， 因为要闩咗个水喉先可谷到个水压，如果唔係4日都接唔到水，就好阴功。”
刘丹表示当年到街喉排队取水场面至今仍历历在目：“啲人一知道有水车嚟就会摆晒啲桶喺度，但又要搵人睇住，有时就会搵啲小朋友睇。当大人返到嚟，个小朋友就喺度喊，个桶又唔见咗，因为有啲衰人会虾啲小朋友，又有人会踢开其他人嘅桶，所以好多时会打交收场，后尾要警方派人睇住先有改善。有时啲男人返晒工，得番妇孺喺屋企，见到佢哋挽住两桶水又要拖住啲细路，落楼下担水再上番楼，嗰种痛苦真係好惨。当时用每滴水都谂过度过，有时天气热，但边有咁多水可以冲凉，所以就拎一盘水嚟抹身，嗰盘水抹完都变晒色。洗米亦唔会话洗几次，嗰时只係洗一次就算，再留番啲水嚟抹嘢。”刘丹因此一直教导子女和孙女要节约用水：“就算依家有东江水，都係得来不易，唔係用之不尽。”
罗乐林最难忘当年排队取水及节约用水的日子：“每一壳水都会尽量用尽佢，例如谂吓洗完面或冲完凉嘅水可以用嚟淋边度，会计清计楚，唔可以一用完就倒咗去。就算依家有东江水亦嚟得不易，都要经历好多嘢先可以送到嚟香港。其实唔单止用水，大家要记得任何嘢都係唔容易，要学识唔好浪费。”
