明报：张振朗与女友杨偲泳运气夹互相催旺事业︰直情係护身符
张振朗近日接受商台《星光背后》访问，表示入行14年由跑龙套开始做起，直至2015年主演《爱回家2》后才开始有稳定收入，因此十分感恩父母多年来支持自己追梦。回想那段月入6000元的日子，振朗表示︰“凌晨将军澳收工最辛苦，坐公司车去旺角转红Van，返到屯门仲要行好远至到屋企。当时起居饮食唔够钱，好记得沉震轩带我食日本拉麵，我一望餐牌，咁贵点算？或者佢睇穿我，于是话‘我请你啦’；又有一次同朱敏瀚、乐彤出去食嘢，又係见到菜单好贵，佢哋都係讲咗一句‘我请你啦’。好记得呢啲画面。当时我连冻饮加两蚊都唔够胆，事关第二日食饭，可能就係争呢两蚊。”
他表示收入未稳定时，一直靠家人支持，妈妈及哥哥有帮忙。振朗表示︰“阿妈帮得最多。我一定有唔好意思，都20到尾大个仔。阿妈係无限量支持我，但都曾经问我需唔需要考虑将来转行。当佢知道我好想继续演戏，都係继续无条件支持我。因为冇人估到我近5年嘅转变，所以都会担心我，但起码到今日，我冇令阿妈失望。”
振朗6年前曾被封为“地狱黑仔王”，连续5套剧被抽起、拍剧时多次受伤，甚至要即时送院急救。他难忘当时正在拍摄《反黑路人甲》︰“嗰几次受伤係好恐怖﹗嗰啲剧，朝早话播，到晏昼又唔播。嗰时我都会谂，个天觉得我唔啱呢行？好彩我乐观，都会认为自己好彩，会谂如果啲剧当时播，或者会畀人闹到反艇喎？嗰两次严重意外，如果我真係黑仔，有可能瓜咗喎？个cam跌落嚟嗰次，有可能毁容喎？好彩只係中膊头！我知道凡事往好方面睇，好嘢自然会埋嚟。”
振朗和女友杨偲泳相恋6年以来，两人事业也稳步上扬。他认同和女友互相催旺事业︰“我哋摆明运气夹，直情係护身符咁，哈！”振朗表示两人关係稳定，不急于结婚。他说︰“我好传统嘅，到依家都锺意同屋企人住。当然，我会想做呢件事，依家关係好舒服，但要等多一阵，因为我同佢都衝刺紧。我哋係好chill嗰种，突然之间听日做都唔出奇。”
振朗表示入行至今的目标都是储够钱置业，购入一间能8人同住的独立屋，与父母及哥哥一家四口同住。他笑言︰“佢哋6个之外仲有一个係边个呢？哈哈！同屋企人一齐住好开心呀﹗”振朗认为偕另一半与家人同住，不会失去二人世界空间。振朗表示︰“凌晨佢哋瞓晒觉嘅时候，自然有私人空间。最好係一幢四层楼嘅独立屋，一人一层，地下畀大家一齐玩，所以我要好努力搵钱。”
