星岛：吴若希想做谐星视麦美茵为劲敌 自知冇身材首做台庆剧女一卖搞笑
吴若希(Jinny)于TVB台庆剧《香港人在北京》中以夸张手法演绎投资失败嘅跟得老婆Helen，跟陈展鹏搞笑互动，观众好锺意係咁畀Like。入行13年的Jinny曾跟菊梓乔为争做“星梦一姐”恶斗多年，𠵱家菊梓乔事业滞后；Jinny既有幸福家庭又重新上位做女主角，从来都话斗长命，Jinny风骚坦言傻人有傻福，好彩多过努力。採访：方骞平 摄影：钱文坤
剧中吴若希充份发挥喜感，有唔少笑位。原来Jinny喺周星驰及苑琼丹身上偷师：“陀B时训唔著最锺意翻煲周星驰嘅《算死草》、《九品芝麻官》…尤其锺意睇星爷同苑琼丹对闹场口，苑琼丹可以一轮嘴讲对白，好犀利。”
爆老公锺意平胸
Jinny靠搞笑演出争一席位：“我唔敢渴求做苑琼丹接班人，暂时我做谐星嘅最大劲敌係好姊妹麦美茵，佢转数好快；我胜在够蠢成日闹笑话俾人笑，而且拥有佢冇嘅长腿。”剧中Jinny着吊带背心睡裙晒长腿“生擒”老公陈展鹏，见她身材欠奉！她笑说：“现实中我老公何兆鸿就係锺意我咁(平胸)，我隆胸佢唔会Like，而且佢都排骨咁有乜资格嫌弃我。”
Jinny对于首做女一零压力，因为演员“人脚”好，对手能带住她演出，角色又似做返自己，最开心可以跟儿时偶像梁汉文(Edmond)及卢庆辉合作，31岁的她更自爆童年回忆，读小六时上网下载 Edmond嘅《七友》；2001年又晚晚追睇《封神榜》，见卢庆辉饰演嘅“伯邑考”被“妲己”温碧霞杀害，再搓成兔肉丸献畀纣王就好惊：“我知佢𠵱家在生好安全，经已好安心喇。”
另外，Jinny承认自己好运，就算点任性，突然要结婚生仔都继续有机会，强调从冇执著做“星梦一姐”，反而enjoy目前拥有嘅嘢。
