周嘉洛疑被前幕后网民点揞名“周街鳄”指扮嘢：我觉得好合理 | 香港01
周嘉洛（24/11）现身将军澳电视城出席TVB处境喜剧《爱回家之开心速递》宣传活动。对于早前有曾任职幕后的网民，在网上发文点揞名爆料指007、短脚虾伉俪、痰＋池、老千哗、周街鳄等人摆款，同时亦特别点名大讚洪永城及袁文杰为人友善有倾有讲。
周嘉洛接受《香港01》访问时表示：“其实呢个问题我都知咗好多年，可能有时候可能笑少咗一吓，可能就会令人误会咗，因为可能人哋会睇第一印象。不过如果嗰个人讲紧我，但又未知係唔係，其实我就无所谓嘅，因为如果有人讲紧我，我就觉得好合理嘅。咁所以我之后都会留意吓改善吓，就算再攰啲，都要对人微笑同打招呼。
（你係咪只对靓女微笑打招呼！）都唔係，一般嚟讲对住靓女反而会少啲，如果有机会，我对你唔点头打招呼，有机会你好靓，我怕丑就会抵头，不过呢个都係讲笑啫。哈哈！不过讲真，自问一般我对人都好有礼貌嘅，咁但礼貌呢啲嘢就好难讲自己係，係要人话先知係嘅，咁所以有人反映嘅话，我都愿意接受，自己都会多加注意。
（会唔会觉得做艺人有时左右做人难？）有时候都会咁谂，但大部分时间就要提返自己，做呢行就会畀人评头品足，咁所以我係好明白，咁所以我会继续努力再做更好。”
