星岛：朱智贤“封胸”展开人生另一页 TVB黄金十年学会精叻做人
37岁的朱智贤于今年9月15日约满离巢TVB，结束长达10年嘅宾主关係。朱朱于10年前参选港姐入行，之后经历做过娱乐新闻台主播、主持，再到拍剧，为TVB献上黄金十年，然而十年间嘅高低起跌，教她多思考，精啲做人，亦带给她有危机意识，警觉到喺观众睇嫌自己身材前，要见好就收，展开人生另一页。
採访：方骞平 摄影：朱伟彦 场地：Variety Music Academy
《企业强人》后係朱智贤告别TVB剧作，她坦言TVB对她好好，甚至出动包薪挽留，但唔想再留喺温室被动工作，𠵱家她大个女“大学”毕业了，野心大咗，好想转个环境，靠自己努力搵多啲，因为家有患上心脏病嘅老犬，恆常医药费开支好大，故有财政压力：“回复自由身两个多月后，收入係比以前好嘅，男友谢东闵知我搞得掂，唔使经济支援。”
往事只能回味
朱智贤曾被封《3日2夜》女神，32C激凸上围更成为热话，朱智贤自言要退位：“其实年纪问题係主要因素，TVB每年有咁多后生仔女，我年纪唔细喇，係时候慢慢转型，唔可以成日仲着泳装去拍旅游节目《3日2夜》，唔通拍到50岁咩？早几年公司畀工作就做，一直冇思考过前路，直至某日突然间醒觉，计计吓唔对路喎！过多两年就算自己想拍，人哋都未必想睇，唔好吓人喇，见好就收，我唔想被人批评，记忆永远是最美好的，哈！往事只能回味。”
她认为自己身材高高瘦瘦胜在够平均，却非“澎湃”嗰种，加上着嘅三点式唔係特别少布，所以初期拍《3日2夜》时一直冇人留意，其后突然喺年30晚播出嘅台湾篇爆红，她都意想不到。
问到在TVB十年嘅启发？朱朱承认呢十年喺人和事上都有好多开心及不开心经历：“我个性格比较简单直接，而且转数慢唔係好聪明，𠵱家学会慢慢思考，精啲做人，好彩唔开心时会做运动及睇书，个人就会开心好多。”
